மாணவர் முரசு
இ-பேப்பர்
2028ஆம் ஆண்டுக்குள், சிங்கப்பூர் ஆயுதப்படையின் பணியாளர்களின் மருத்துவப் பதிவுகள் இங்குள்ள மூன்று பொதுச் சுகாதாரக் குழுமங்களுடனும் ஒருங்கிணைக்கப்படும். இது, பராமரிப்புப் பணிகளை மிகவும் தடையின்றி மாற்ற வழி வகுக்கும்.
சிங்கப்பூர் ஆயுதப்படையின் பதிவு முறை, தற்போது தேசிய சுகாதாரக் குழுமம் மற்றும் தேசிய பல்கலைக்கழகச் சுகாதாரக் குழுமம் ஆகியவற்றில் பயன்படுத்தப்படும் அடுத்த தலைமுறை மின்னணு மருத்துவப் பதிவு முறையுடன் ஒருங்கிணைக்கப்படும்.
அடுத்த தலைமுறை மின்னணு மருத்துவப் பதிவு முறை, 2028ஆம் ஆண்டுக்குள் சிங்ஹெல்த் குழுமத்துக்கும் விரிவுபடுத்தப்படும்.
சுகாதாரத் தொழில்நுட்ப நிறுவனமான ‘சினாப்சே’ மற்றும் தற்காப்பு அறிவியல், தொழில்நுட்ப நிறுவனம் (டிஎஸ்டிஏ) ஆகியவை செப்டம்பர் மாதம் சிங்கப்பூர் ஆயுதப்படை மருத்துவ மையங்களின் மருத்துவப் பதிவு முறைகளை, அடுத்த தலைமுறை மின்னணு மருத்துவப் பதிவு முறையுடன் ஒருங்கிணைப்பதற்கான ஒப்பந்தத்தில் கையெழுத்திட்டன.
ஹில்வியூவில் உள்ள புதிய மத்திய ஆள்பலத் தளத்தில், சிங்கப்பூர் ஆயுதப்படை மருத்துவப் பிரிவுக்கும் சிங்ஹெல்த் குழுமத்துக்கும் இடையேயான புரிந்துணர்வு ஒப்பந்தம், அக்டோபர் 24ஆம் தேதி கையெழுத்தானபோது, தற்காப்பு துணை அமைச்சர் டெஸ்மண்ட் சூ இதை அறிவித்தார்.
மருத்துவத் தகவல்களின் இரண்டு தனித்தனி களஞ்சியங்கள் இருப்பதால், மருத்துவர்களுக்கு முழு விவரம் கிடைக்காமல் போகலாம். இதனால் நகல் பரிசோதனைகளும் தாமதமான சிகிச்சைகளும் நிகழ வாய்ப்புள்ளது.
சிங்கப்பூர் ஆயுதப்படை மருத்துவ அமைப்புகள், அடுத்த தலைமுறை மின்னணு மருத்துவப் பதிவு முறையுடன் ஒருங்கிணைக்கப்பட்டதன் மூலம், ஒவ்வொரு சேவைப் பணியாளர்களுக்கும், துறையில் உள்ள அவர்களின் மருத்துவர்களுக்கும், மருத்துவமனையில் உள்ள அவர்களின் மருத்துவ நிபுணர்களுக்கும் இடையே அணுகக்கூடிய ஓர் ஒற்றை சுகாதாரப் பதிவு இருக்கும் என்று திரு சூ விளக்கினார்.
தொடர்புடைய செய்திகள்
“சிங்கப்பூர் ஆயுதப்படை மருத்துவ முறை ஏற்கனவே தேசிய மின்னணு சுகாதாரப் பதிவு மூலம் மற்ற சுகாதாரப் பராமரிப்பு வழங்குநர்களுடன் இணைக்கப்பட்டுள்ளது. ஆனால் அது நோயறிதல், மருந்துகள் போன்ற அடிப்படைத் தகவல்களை மட்டுமே உள்ளடக்கியது,” என்று சிங்கப்பூர் ஆயுதப்படை மருத்துவப் பிரிவுகளின் தலைவரான பிரிகேடியர் ஜெனரல் (டாக்டர்) லீ வெய் டிங் தெரிவித்தார்.
தற்போதைய முறையின் கீழ், ஒரு நபர் சிங்கப்பூர் ஆயுதப்படையிலிருந்து பொதுச் சுகாதாரப் பராமரிப்புத் துறைக்கு மாற்றப்படும்போது, சிங்கப்பூர் ஆயுதப்படையின் மருத்துவ அதிகாரிகள் மருத்துவமனைக்கு வழங்கப்பட்ட சிகிச்சையின் எழுத்துபூர்வ குறிப்பு அல்லது மின்னஞ்சலில் வழங்க முடியும் என்று விளக்கப்பட்டது.