ஏஐ தொழில்நுட்பத்தை ஊழியர்களிடம் சேர்ப்பது சிங்கப்பூருக்கு எளிது: கான் கிம் யோங்

செயற்கை நுண்ணறிவுத் (ஏஐ) தொழில்நுட்பத்தைப் பயன்படுத்தும் ஊழியரணியை உருவாக்குவது சிங்கப்பூருக்கு எளிதான ஒன்று எனத் துணைப் பிரதமர் கான் கிம் யோங் கூறியிருக்கிறார்.

சிங்கப்பூர் சிறிய நாடு என்பது ஏஐ தொழில்நுட்பத்தைப் பொறுத்தவரை சாதகமாக அமையும் என்றார் அவர். அவ்வாறு இருப்பதால் மிகவும் எளிதாக ஏஐ தொழில்நுட்பம் குறித்த பயிற்சிகளையும் மேம்பாட்டுத் திட்டங்களையும் ஊழியர்களிடம் கொண்டுசெல்ல முடியும் என்று வர்த்தக, தொழில் அமைச்சருமான திரு கான் சொன்னார். அதிக மக்கள்தொகையைக் கொண்ட நாடுகளில் அது மிகவும் சிரமமாக இருக்கும் என்று அவர் குறிப்பிட்டார்.

சிங்கப்பூர் எக்ஸ்போவில் நடைபெற்ற சிங்கப்பூர் நிதித்தொழில்நுட்ப விழா 2025ல் புதன்கிழமை (நவம்பர் 12) பேசிய திரு கான், செயற்கை நுண்ணறிவைச் சிங்கப்பூர் மூன்று நிலைகளில் பார்க்க விரும்புவதாகச் சொன்னார்.

முதல் நிலையில், நிறுவனங்களுக்கும் அவற்றின் வாடிக்கையாளர்களுக்கும் செயற்கை நுண்ணறிவுத் தொழில்நுட்பத்தைப் பற்றிய அடிப்படைப் புரிந்துணர்வு இருப்பதைச் சிங்கப்பூர் உறுதிசெய்ய விரும்புவதாக அவர் கூறினார்.

இரண்டாம் நிலை, வர்த்தகக் கட்டமைப்பில் ஏஐ தொழில்நுட்பத்தை ஒருங்கிணைப்பதற்கான ஆற்றல்களை வளர்ப்பது தொடர்பானது.

மூன்றாம் நிலையானது, புதிய தொழில்நுட்பம், செயல்முறைகள், துணைக் கருவிகள் முதலியவற்றை உருவாக்குவது என்றார் திரு கான்.

ஊழியர்கள், பயிற்சிக்குச் செல்லவேண்டியதன் அவசியத்தை அவர் வலியுறுத்தினார். பயிற்சி என்பது ஊழியரணியில் செய்யப்படும் ஒரு வகையான முதலீடு என்று நிறுவனங்கள் கருதவேண்டும் எனச் சொன்னார் துணைப் பிரதமர் கான்.