மாணவர் முரசு
இ-பேப்பர்
சிறுகோரிக்கை நடுவர் மன்றங்களில் தங்கள் வழக்குகளைத் தாங்களாகவே பிரதிநிதிப்போருக்குக் கைகொடுக்கவிருக்கிறது புதிய ஆக்கமுறை செயற்கை நுண்ணறிவுச் (GenAI) சாதனம்.
நீதித்துறையின் இந்த ‘ஏஐ’ சாதனத்தால் நீண்ட ஆவணங்களின் சுருக்கவுரையை தனிமனிதர்கள் பெற இயலும்.
வாதி, பிரதிவாதி என இருதரப்பும் ஒப்புக்கொண்டால் S$20,000 (US$15,600) அல்லது S$30,000 வரையிலான உரிமைகோரல்களைப் பெறக்கூடிய சிறுகோரிக்கை நடுவர் மன்றங்களில் வழக்கு தொடுப்போர் வழக்குகளைப் பற்றிய தங்களின் புரிதலை மேம்படுத்தவும், அவர்களின் நீதிமன்ற ஆவணங்களைத் தயாரிக்கவும் இந்தச் சாதனத்தைப் பயன்படுத்தலாம்.
இத்தகைய வழக்கு ஆவணங்களின் சுருக்கவுரையை நீதிபதிகள் மட்டும் பயன்படுத்தும் வகையில் புதன்கிழமை (செப்டம்பர் 10) நிறுவப்பட்ட இந்தச் சாதனம் நவம்பர் மாதத்தில் வழக்கு தொடுப்போரும் பயன்படுத்தும் வகையில் செயலாக்கம் காணவுள்ளது என்றும் இதற்கான தேதி பின்னர் அறிவிக்கப்படும் என்றும் சிங்கப்பூர் நீதிமன்றங்கள் வெளியிட்ட அறிக்கை சுட்டியது.
தொழில்நுட்பம் மூலம் நீதியை இன்னும் சிறப்பாக அணுகுவதற்கான விரிவான முயற்சியின் ஒரு பகுதியாக வெளிவந்திருக்கிறது இந்த அம்சம்.
சிறு கோரிக்கை நடுவர் மன்றங்களில் வழக்கு தொடுப்போரும் அதனை எதிர்கொள்வோரும் தாங்களாகவே அவர்கள் வழக்கைப் பிரதிநிதிப்பார்கள்; அவர்களுக்கு வழக்கறிஞர்கள் இருப்பதில்லை.
தற்போதைய சூழலில் வாதி, பிரதிவாதி என இருதரப்பும் தங்கள் சொந்த ஆவணங்களை அவர்களாகவே தாக்கல் செய்கிறார்கள். அதில் ரசீதுகள், வாட்ஸ்அப் தொடர்புகள் உள்ளிட்ட பிற ஆதாரங்கள் அடங்கும்.
வழக்கு தொடர்பிலான தங்கள் சொந்த ஆவணங்களைத் தயாரிக்கும்போது எதிர்த்தரப்பிலிருந்து சில நேரங்களில் பெரிய ஆவணங்களை வழக்கு தொடுப்போர் படிக்க நேரிடும். அவ்வகையில் புதிய ஏஐ சாதனம் மூலம், தீர்ப்பாய நீதிபதிகள் இப்போது ‘ஒவ்வொரு முறையீட்டிலும் உள்ள உண்மைகளைப் பற்றிய தெளிவான புரிதலுடன்’ விசாரணைக்கு ஏதுவாக இதைப் பயன்படுத்தலாம் என்று சிங்கப்பூர் நீதிமன்றங்கள் கூறின.
ஆவணங்களின் பகுப்பாய்வை நெறிப்படுத்துவதன் மூலம், வழக்கின் மிகவும் சிக்கலான அம்சங்களில் தங்கள் நேரத்தையும் நிபுணத்துவத்தையும் வழங்க இந்தச் சாதனம் நீதிபதிகளுக்கு உதவிடும். மேலும், இந்தப் புதிய சாதனத்திற்கான இணையப்பக்கத்தில் வாதிகளும் பிரதிவாதிகளும் அவர்கள் வழக்குகள் தொடர்பில் பதிவேற்றப்பட்ட ஆவணங்களைப் பார்க்க முடியும். சுருக்கவுரை உருவாக்கத்திற்கு 10 முதல் 15 நிமிடங்கள்வரை ஆகும்.
மேலும், இந்தச் சுருக்கவுரை ‘தகவல் நோக்கங்களுக்காக மட்டுமே’ என்பதும் அது சட்ட ஆலோசனைக்கானதன்று என்பதும் பொறுப்புத் துறப்பு வாசகமும் இடம்பெற்றிருக்கும் என்பதும் குறிப்பிடத்தக்கது.