வீடுபுகுந்து ‘ஐஃபோன்’ திருடியதாக ‘காராங்குனி’மீது புகார்

செம்பவாங்கில் வீட்டுக் கதவை திறந்த நிலையில் வைத்துவிட்டுச் சென்று உள்ளே குழந்தையை தாய் சுத்தம் செய்துகொண்டிருந்தபோது, ‘காராங் குனி’ சேவை வழங்கும் ஆடவர், வீடுபுகுந்து ஒரு ‘ஐஃபோன் பிளஸ்’ வகை (iPhone 15 Plus) கைப்பேசியை திருடியதாக குடியிருப்பாளர் ஒருவர் புகாரளித்துள்ளார்.

புளோக் 355A செம்பவாங் கிரெசன்ட் வீடமைப்பு வளர்ச்சிக் கழக வீட்டில் அக்டோபர் 16ஆம் தேதியன்று சம்பவம் நிகழ்ந்துள்ளது. அதுபற்றிய காணொளி ‘ஸ்டோம்ப்’ சமூக ஊடகத்தில் வெளிவந்துள்ளது. காணொளியில், கையில் ஒலியெழுப்பும் சாதனத்துடன் முதுகில் பை ஒன்றைச் சுமந்தபடி ஆடவர் அந்த வீட்டின் வெளியே நடமாடுவது பதிவாகியுள்ளது.

காணொளி ‘ஸ்டோம்ப்’ வாசகர் ‘கொக்கொ’ என்பவரின் வீட்டின் வெளியே பதிவானது என்றும் குறிப்பிடப்பட்டுள்ளது.

வீட்டின் வெளியில் நடமாடிய பிறகு, அங்கிருந்து செல்ல மாடிப் படிக்கட்டுகளை அடைந்த ஆடவர், அருகில் உள்ள வீட்டை பார்வையிடுவது வரை காணொளியில் தெரிகிறது. காணொளி முடியும் தருவாயில் சுவர் மறைத்ததனால் அவரின் நடவடிக்கை பதிவாகவில்லை.

அச்சமயம் அவரது வலப்புறத்தில் திறந்திருந்த வீட்டுக்குள் புகுந்து, ஆடவர் சந்தர்ப்பத்தைப் பயன்படுத்தி வாசல் அருகில் மறந்து வைக்கப்பட்டு இருந்த கைப்பேசியை திருடினார் என்று வாசகர் குற்றம் சுமத்தியுள்ளார்.

தள்ளுவண்டியில் குழந்தையை வீட்டுக்கு அழைத்துவந்தபோது அது கழிவை வெளியேற்றிவிடவே, அதனைச் சுத்தம் செய்ய அவசரத்தில் தாய் வீட்டுக்குள் சென்றுள்ளார். தள்ளுவண்டி அல்லது வாசல் அருகே கைப்பேசி விடப்பட்டிருக்கலாம் என்று ஸ்டோம்ப் வாசகர் கருத்துரைத்துள்ளார்.

புகார் செய்யப்பட்டதை காவல்துறை உறுதிசெய்துள்ளது. விசாரணை தொடர்கிறது.