சட்ட நிறுவன இயக்குநர், விசாரணைக்கு முந்தைய நாள் மரணம்

சட்ட நிறுவனமொன்றின் இயக்குநர் தனராஜ் ஜேம்ஸ் செல்வராஜ், வழக்கு விசாரணைக்கு முந்தைய நாள் மரணமடைந்ததைத் தொடர்ந்து அவருக்கு எதிரான குற்றச்சாட்டுகள் கைவிடப்பட்டுள்ளன. அவர் $4,000ஐ முறைகேடு செய்ததாகக் குற்றஞ்சாட்டப்பட்டிருந்தது.

61 வயது திரு தனராஜின் இறப்புச் செய்தியில் அவர் புதன்கிழமை (அக்டோபர் 22) மரணமடைந்ததாகக் குறிப்பிடப்பட்டிருந்தது. அவர் மீதான வழக்குவிசாரணை அதற்கு அடுத்த நாள் நடைபெறவிருந்தது. ஆனால் அதே நாள் நீதிமன்ற நடைமுறைகள் முடிவுக்கு வந்துள்ளன.

ஜேம்ஸ் செல்வராஜ் சட்ட நிறுவனத்தில் இயக்குநராக இருந்தவர் திரு தனராஜ். வெள்ளிக்கிழமை (அக்டோபர் 24) சட்ட அமைச்சின் இணையத்தளத்தில் தேடியபோது அவரின் விவரங்கள் கிடைக்கவில்லை என்று தெரிவிக்கப்பட்டது.

திரு வேல்முருகன் ரமே‌‌ஷ் என்பவருக்கு வழக்கறிஞராய் அவர் செயல்பட்டதாக நீதிமன்ற ஆவணங்கள் குறிப்பிடுகின்றன. 2020ஆம் ஆண்டு மார்ச் மாதத்திற்கும் ஏப்ரலுக்கும் இடையில் $4,000ஐ அவர் முறைகேடு செய்ததாகச் சந்தேகிக்கப்படுகிறது.

2019ஆம் ஆண்டு ஜூன் மாதம் 21ஆம் தேதி வாக்கில், 51 வயது டேவிட் ராஜ் டேனியல் கிரு‌‌ஷ்ணன் எனும் மூன்றாமவருடன் உடன்பாடு ஒன்றைச் செய்துகொண்டதாகவும் திரு தனராஜ் மீது குற்றஞ்சாட்டப்பட்டுள்ளது.

திரு வேல்முருகனின் வழக்கைப் பற்றியோ ஆடவர் மூவருக்கும் இடையிலான உறவு குறித்தோ நீதிமன்ற ஆவணங்களில் விவரங்கள் இல்லை.

திரு டேவிட் மீதான வழக்கு இன்னும் நிலுவையில் உள்ளது.