மாணவர் முரசு
இ-பேப்பர்
லிட்டில் இந்தியாவில் அமைந்துள்ள, மதுபானம் விற்கும் 13 சில்லறை விற்பனைக் கடைகள் மீது விசாரணை நடைபெறுவதாகக் காவல்துறை கூறியுள்ளது.
மது அருந்துதல், மதுபான விற்பனை ஆகியவை தொடர்பான பல்வேறு விதிமீறல்கள் குறித்து விசாரணை நடைபெறுகிறது.
அக்டோபர் 5ஆம் தேதிக்கும் 20ஆம் தேதிக்கும் இடையே அதிகாரிகள் மேற்கொண்ட அமலாக்க நடவடிக்கையைத் தொடர்ந்து இந்த விசாரணை நடைபெறுவதாகக் காவல்துறை திங்கட்கிழமை (அக்டோபர் 27) வெளியிட்ட அறிக்கையில் தெரிவித்தது.
லிட்டில் இந்தியா பகுதி மதுபான விற்பனைக்குக் கட்டுப்பாடு விதிக்கப்பட்டுள்ள வட்டாரம் ஆகும். அவ்வாறு கட்டுப்பாடு விதிக்கப்பட்ட வட்டாரத்தில், மதுபானத்துக்கான சில்லறை விற்பனை உரிமம் பெற்றுள்ள கடைகள் திங்கட்கிழமை முதல் வெள்ளிக்கிழமை வரை காலை 7 மணி முதல் இரவு 10.30 மணி வரை மட்டுமே மதுபானங்களை விற்கலாம்.
சனி, ஞாயிற்றுக்கிழமைகளிலும் பொது விடுமுறை நாள்கள், அவற்றுக்கு முந்தைய நாள்களிலும் காலை 7 மணி முதல் இரவு 7 மணி வரை மட்டுமே அந்தக் கடைகள் மதுபானங்களை விற்க முடியும்.
காவல்துறை அதிகாரிகள் விசாரணை நடத்தும் கடைகள் நோரிஸ் ரோடு, கஃப் ரோடு, அப்பர் வெல்டு ரோடு, டன்லப் ஸ்திரீட், சந்தர் ரோடு, வீராசாமி ரோடு, பஃப்ளோ ரோடு, ரோவெல் ரோடு ஆகியவற்றில் அமைந்துள்ளன.
அந்தக் கடைகளில் ஒன்று, சில்லறை விற்பனைப் பிரிவின் ஒரு பகுதியை வாடிக்கையாளர்கள் தற்காலிகமாக மது அருந்தும் வகையில் மாற்றி அமைத்திருந்ததாகக் கூறப்பட்டது.
மூன்று கடைகள் உரிமமின்றி மதுபானங்களை விற்பனை செய்ததாகக் கூறப்படுகிறது.
தொடர்புடைய செய்திகள்
எஞ்சிய ஒன்பது கடைகள், மது விற்பனைக்குக் கட்டுப்பாடு விதிக்கப்பட்ட பகுதியில் மதுபான விற்பனைக்கு ஒதுக்கப்பட்ட நேரத்துக்கு அப்பாலும் மதுவை விற்பனை செய்ததாகக் கூறப்பட்டது.
உரிமமின்றி மதுபானம் விற்பனை செய்த குற்றம் நிரூபிக்கப்பட்டால் $20,000 வரையிலான அபராதம் விதிக்கப்படலாம். அடுத்தடுத்த முறை அதே குற்றத்தைப் புரிந்தால் $20,000 வரையிலான அபராதமோ மூன்று மாதங்கள் வரையிலான சிறைத்தண்டனையோ இரண்டுமோ விதிக்கப்படலாம்.
மதுபான விற்பனைக்குக் கட்டுப்பாடு விதிக்கப்பட்டுள்ள வட்டாரத்தில், ஒதுக்கப்பட்ட நேரத்துக்கு அப்பாலும் மது விற்பனை செய்த குற்றம் நிரூபிக்கப்பட்டால் $10,000 வரையிலான அபராதம் விதிக்கப்படலாம்.