சிங்கப்பூர் ஆற்றில் குதித்து ஆடவர் மரணம்

சிங்கப்பூர் ஆற்றிலிருந்து 34 வயது ஆடவரின் சடலம் வியாழக்கிழமை (அக்டோபர் 30) மீட்கப்பட்டுள்ளது. மெர்லயன் பூங்கா அருகே இச்சம்பவம் நடந்தது.

வியாழக்கிழமை இரவு 10 மணிவாக்கில் ஆடவர் ஒருவர் ஆற்றில் விழுந்துவிட்டதாக உதவிகோரி தங்களுக்கு அழைப்பு வந்ததாகச் சிங்கப்பூர் காவல்துறை கூறியது. அதன்பின்னர் அங்குச் சென்ற அதிகாரிகள் ஆடவரின் சடலத்தை நீரிலிருந்து மீட்டனர்.

ஆடவர் சம்பவ இடத்திலேயே மாண்டதாகச் சிங்கப்பூர் குடிமைத் தற்காப்புப் படையின் மருத்துவ உதவியாளர்கள் தெரிவித்தனர். ஆரம்பக்கட்ட விசாரணையின்படி ஆடவர் மரணத்தில் சூது ஏதுமில்லை.

ஆடவரின் சடலம் கிட்டத்தட்ட 15 நிமிடங்கள் எஸ்பிளனேட் பாலத்திற்குக் கீழ் மிதந்து கொண்டிருந்ததாகச் சமூக ஊடகத்தில் காணொளிகள் பதிவிடப்பட்டுள்ளன. ஆடவர் பாலத்திலிருந்து குதித்ததாகச் சம்பவத்தை நேரில் பார்த்த சிலர் குறிப்பிட்டனர்.

இதற்கிடையே அதிகாரிகளின் மீட்புப்பணிகள் நடந்தபோது தாம் அங்கு இருந்ததாகத் திரு இறை. மதியழகன் தமிழ் முரசிடம் தெரிவித்தார்.

“இந்தச் சம்பவம் நடந்த சமயத்தில் மெர்லயன் பூங்காப் பகுதியில் நான் இருந்தேன். கோவையிலிருந்து சுற்றுப் பயணம் வந்திருந்த எனது நண்பர்களை அழைத்துச் சென்று புகைப்படம் எடுத்து கொண்டிருந்தேன்.

“திடீரென்று அவசர மீட்புப் படகுடன் மெர்லயன் சிலை அருகே இருக்கும் படிகள் வழி குடிமைத் தற்காப்புப் படை அதிகாரிகள் இறங்கிக் கொண்டிருந்தார்கள். அந்தப் பகுதி வழியாக மக்கள் நடக்காமல் இருக்க வேகமாகத் தடுப்புகள் போடப்பட்டன.

“அப்போது என்ன நடந்திருந்தது என்ற விவரம் எங்களுக்குத் தெரியவில்லை. யாரோ நீரில் விழுந்திருக்கிறார்கள் என்பதை, அதிகாரிகளின் பரபரப்பைப் பார்த்து உணர்ந்து கொண்டோம். நேரமாகி விட்டதால் அங்கிருந்து வெளியேறி விட்டோம்,” என்று மதியழகன் குறிப்பிட்டார்.

தொடர்புடைய செய்திகள்

நல்வாழ்வை நோக்கிய பயணத்தின் ஏற்ற இறக்கங்கள்

காவல்துறையின் விசாரணை தொடர்கிறது.