மாணவர் முரசு
இ-பேப்பர்
தற்காப்பு அமைச்சு, உள்துறை அமைச்சு ஆகியவற்றில் பணியாற்றுவோருக்குரிய வாழ்நாள் காப்புறுதி மற்றும் காயங்களுக்கான காப்புறுதிகளில் வழங்கப்படும் தொகையில் $50,000 அதிகரிக்கிறது.
இந்த மாற்றம் நவம்பர் 1 முதல் நடப்புக்கு வருகிறது.
காப்புறுதித் தொகை $300,000லிருந்து $350,000க்கு அதிகரிக்க இருப்பதாகவும் இந்த மாற்றத்தின் மூலம் ஏறத்தாழ 500,000 பணியாளர்கள் பலனடைவர் என்றும் இரு அமைச்சுகளும் வெள்ளிக்கிழமை (அக்டோபர் 31) வெளியிட்ட கூட்டறிக்கை தெரிவித்தது.
அந்த இரு அமைச்சுகளின் முழுநேர தேசியச் சேவையாளர்கள் முதல் தொண்டூழியர்கள் வரை காப்புறுதித் தொகை உயர்வைப் பெறுவர்.
தற்காப்பு மற்றும் உள்துறை அமைச்சுகளுக்கான குழுக் காப்புறுதித் திட்டம் 2016ஆம் ஆண்டு அறிமுகம் கண்டது. வாழ்நாள் மற்றும் விபத்துகளுக்கான காப்புறுதித் தொகை தொடக்கத்தில் $150,000ஆக அறிவிக்கப்பட்டது.
தேசிய சேவையை வலுப்படுத்துவதற்கான குழு அறிவித்த 30 பரிந்துரைகளில் இந்தக் குழுக் காப்புறுதித் திட்டமும் ஒன்று.
தேசிய சேவையாளர்களின் பங்களிப்பை அங்கீகரிக்கவும் அவர்களுக்கான பராமரிப்பை வலுப்படுத்தவும் அந்தத் திட்டம் அறிவிக்கப்படுவதாக அப்போது வெளியான அறிக்கை குறிப்பிட்டது.
2023 ஜனவரி 1 முதல் அந்தக் காப்புறுதித் தொகை $300,000 என இரட்டிப்பானது. தனிநபர் விபத்துக் காப்புறுதி, அதிக நன்மைகளுடன் தனிநபர் காயங்களுக்கானக் காப்புறுதி என மாற்றம் கண்டது.
