மாணவர் முரசு
இ-பேப்பர்
50 மற்றும் அதற்கு மேற்பட்ட வயதுடைய சுமார் 56,000 சிங்கப்பூரர்கள் மரபுத் திட்டமிடலை ஊக்குவிப்பதற்காக அரசாங்கத்தால் ஜூலை 2023ல் ஓர் இயக்கம் தொடங்கப்பட்டதிலிருந்து, நீண்டகால அதிகாரப் பத்திரத்தை (Lasting Power of Attorney) (எல்பிஏ) உருவாக்கியுள்ளனர்.
இந்த வயதுப் பிரிவில் உள்ள மொத்தம் 233,000 சிங்கப்பூரர்கள் நீண்டகால அதிகாரப் பத்திரத்தை நிறைவுசெய்துள்ளனர் என்று சமுதாய, குடும்ப மேம்பாட்டு அமைச்சின் மூத்த நாடாளுமன்றச் செயலாளர் எரிக் சுவா தெரிவித்துள்ளார்.
அக்டோபர் 25ஆம் தேதி நடைபெற்ற இந்த இயக்கத்தில் பங்கேற்கும் தொண்டூழியர்களுக்கும் பங்காளிகளுக்கும் நன்றி கூறும் விருந்து நிகழ்ச்சியில் அவர் இத்தகவலை வெளியிட்டார்.
2025ஆம் ஆண்டின் இறுதிக்குள் 240,000 சிங்கப்பூரர்கள் தங்களுடைய எல்பிஏக்களை உருவாக்கும் இலக்கை எட்ட இந்த இயக்கம் சரியான திசையில் சென்றுகொண்டிருக்கிறது என்று அவர் மேலும் கூறினார்.
எல்பிஏ என்பது ஒரு சட்டபூர்வ ஆவணமாகும். இது ஒரு நபர் மனரீதியாக இயலாமை அடைந்தால், உதாரணமாக, டிமென்ஷியா எனும் மூத்தோர் ஞாபகமறதி நோயால் பாதிக்கப்பட்டிருக்கும் ஒருவர் சார்பாக முடிவுகளை எடுக்க மற்றொரு நபரை நியமிக்க அனுமதிக்கிறது.
மரபுத் திட்டமிடல் என்பது தனிநபர்கள் தங்கள் கவனிப்பு மற்றும் நிதி குறித்த அவர்களின் விருப்பங்கள், முடிவுகளைத் தெரிவிப்பது மற்றும் தொடர்புகொள்வதை உள்ளடக்குகிறது. எடுத்துக்காட்டாக, அவர்களின் அன்புக்குரியவர்கள் இறந்தாலோ அல்லது மனத் திறனை இழந்தாலோ அவர்களின் சார்பில் எல்பிஏக்கு நியமிக்கப்பட்டவர்கள் முடிவெடுக்கலாம்.
இது எல்பிஏ, உயில், மத்திய சேமநிதி நியமனம், மேம்பட்ட பராமரிப்புத் திட்டம் போன்ற முறைகள் மூலம் செய்யப்படுகிறது. ஒரு மேம்பட்ட பராமரிப்புத் திட்டம் ஒரு நபர் கொண்டிருக்கும் பண்பு நெறிகள் மற்றும் சுகாதாரப் பராமரிப்பு விருப்பங்களை ஆவணப்படுத்துகிறது. இது சுகாதாரப் பராமரிப்புக் குழு மற்றும் ஒருவரின் அன்புக்குரியவர்கள் மனத் திறனை இழந்தால் அவர்களின் சார்பில் சிறந்த முடிவுகளை எடுப்பதற்கு வழிகாட்டும்.
ஜூலை 2023ல் இந்த இயக்கம் தொடங்கியதிலிருந்து கடந்த 15 மாதங்களில், 13,000க்கும் மேற்பட்ட மேம்பட்ட பராமரிப்புத் திட்டங்களும் உருவாக்கப்பட்டுள்ளன. அத்தகைய திட்டங்களின் மொத்த எண்ணிக்கை 50,000ஐக் கடந்து விட்டது.
தொடர்புடைய செய்திகள்
இந்த இயக்கத்தை சமுதாய, குடும்ப மேம்பாட்டு அமைச்சு, சுகாதார அமைச்சு, ஒருங்கிணைந்த பராமரிப்பு அமைப்பு, பொதுச் சேவைத் துறை ஆகியவை இணைந்து உருவாக்கியுள்ளன.
இன்னும் கூடுதலான விழிப்புணர்வை ஏற்படுத்துவது, தவறான எண்ணங்களை அகற்றுவது, மரபுத் திட்டமிடல் பற்றிய உரையாடல்களை இயல்பாக்குவது அவசியம் என்று திரு சுவா கூறினார்.
மரபுவழித் திட்டமிடல் செலவு மிக அதிகமாக இருப்பதாக சிலர் தவறாக நினைக்கிறார்கள் அல்லது அவர்களின் நெருங்கிய உறவினர்கள் மனநலம் குன்றியவர்களாகிவிட்டால், அவர்கள் சார்பாக தானாகவே செயல்பட உரிமை உண்டு என்று நினைத்திருக்கிறார்கள் என்று ஸ்ட்ரெய்ட்ஸ் டைம்ஸ் அறிகிறது.
ஏனென்றால், பெரும்பாலான சிங்கப்பூரர்கள், பல முதியவர்கள் உட்பட, தங்கள் எல்பிஏ மற்றும் மேம்பட்ட பராமரிப்புத் திட்டங்களைச் செய்யவில்லை.
எனவே, மரபுவழி திட்டமிடல் முறைகளை பொதுமக்களுடன் பகிர்ந்துகொள்வதற்கு நிதித்துறையில் உள்ள நிபுணர்களுக்கு பயிற்சி அளிப்பது உள்ளிட்ட விஷயங்களைப் பற்றி சிந்திக்கத் தொடங்க வேண்டும் என்று அரசாங்கம் சிங்கப்பூரர்களைத் தொடர்ந்து ஊக்குவிக்கும்.
மரபுத் திட்டமிடல் பற்றி மேலும் அறிய go.gov.sg/planlegacytoday இல் உள்ள MyLegacy@LifeSG இணையத்தளத்தை நாடலாம்.