இந்திய சமூகத்தின் வணிக வளர்ச்சியை வளமாக்கிய தொழிற்சபைக்குப் பாராட்டு

நாட்டின் பொருளியல் வளர்ச்சிக்கு நூற்றாண்டு காலமாகப் பங்களித்துவரும் சிங்கப்பூர் இந்திய வர்த்தக, தொழிற்சபைக்குப் பாராட்டியுள்ளார் கலாசார, சமூக, இளையர்துறை; மனிதவள துணை அமைச்சர் தினேஷ் வாசு தாஸ். 

சிங்கப்பூர் இந்திய வர்த்தக, தொழிற்சபை ஒருங்கிணைத்த தேசிய தின நிகழ்ச்சியில் பங்கேற்றார் திரு தினேஷ்.

புதன்கிழமை (ஆகஸ்ட் 6) நடைபெற்ற நிகழ்ச்சியில் உரையாற்றிய அவர், சிங்கப்பூரின் வளர்ச்சியில் தொழிற்சபை வகிக்கும் முக்கியப் பங்கு குறித்துப் பேசினார்.

“தோற்றுவிக்கப்பட்ட நாளிலிருந்து, சிங்கப்பூர் இந்திய சமூகத்தின் வர்த்தக, பொருளியல் வளர்ச்சியைப் பேணுவதிலும் மேம்படுத்துவதிலும் தொழிற்சபை முக்கியப் பங்கு வகித்துள்ளது,” என்று கூறினார் திரு தினேஷ் வாசு.

வர்த்தகங்களைச் செழுமையாக்குவதிலும் வணிகங்களுக்குக் கைகொடுத்து உயர்த்துவதிலும் வர்த்தகக் கட்டமைப்பைக் கட்டிக்காப்பதிலும் புத்தாக்கத்தை ஊக்குவிப்பதிலும் அனைத்துப் பிரிவுகளிலும் உள்ள சிறிய, பெரிய தொழில் நிறுவனங்களின் வளர்ச்சியை ஆதரிப்பதிலும் தொழிற்சபை சீரிய பங்காற்றி வருவதை அவர் சுட்டினார்.

‘ஒருங்கிணைந்து முன்னேறுவோம்’ என்று தேசிய தின நல்வாழ்த்துகளைத் தெரிவித்த அவர், தொழிற்சபையுடன் தொடர்ந்து இணைந்து செயலாற்றுவதில் அரசாங்கம் விழைகிறது என்றும் உறுதியளித்தார்.