மாணவர் முரசு
இ-பேப்பர்
மாண்டோரை அடக்கம் செய்வது தொடர்பான பணிகளுக்குப் பொறுப்பு வகித்த தேசிய சுற்றுப்புற வாரிய அதிகாரி மீது திங்கட்கிழமை (நவம்பர் 10) லஞ்சக் குற்றச்சாட்டு சுமத்தப்பட்டது.
47 வயது அப்துல் சலாம் ஜஹாபர் சாதிக், பத்து பேரிடம் ஏறத்தாழ $21,000 லஞ்சம் வாங்கியதாகக் கூறப்படுகிறது.
சலாமிடம் லஞ்சம் கொடுத்ததாகக் கூறப்படுபவர்களின் நிறுவனங்கள் இறுதிச் சடங்குகள் அல்லது மயானம் தொடர்பான சேவைகளை வழங்குபவை.
இந்தத் தகவலை லஞ்ச ஊழல் புலனாய்வுப் பிரிவு வெளியிட்டது.
ஊழல் தடுப்புச் சட்டத்தின்கீழ் சலாம் மீது பத்து குற்றச்சாட்டுகள் பதிவாகின.
இந்திய நாட்டவரும் சிங்கப்பூர் நிரந்தரவாசியுமான சலாம், கடன்கள் வடிவில் லஞ்சங்களை 2022ஆம் ஆண்டுக்கும் 2023ஆம் ஆண்டுக்கும் இடைப்பட்ட காலகட்டத்தில் வாங்கியதாகக் கூறப்படுகிறது.
விதிமீறல்களைக் கண்டும் காணாமலும் இருக்க சலாமிற்கு லஞ்சம் கொடுக்கப்பட்டதாக நம்பப்படுகிறது.
இந்த வழக்கை லஞ்ச, ஊழல் புலனாய்வுப் பிரிவிடம் தேசிய சுற்றுப்புற வாரியம் ஒப்படைத்தது.
தொடர்புடைய செய்திகள்
தம்மீது சுமத்தப்பட்டுள்ள குற்றச்சாட்டை சலாம் மறுத்துள்ளார்.
அதிகாரிகளிடம் வாக்குமூலம் தந்தபோது தமக்கு மொழிபெயர்ப்புச் சேவை வழங்கப்படவில்லை என்றார் அவர். கடன் மட்டுமே வாங்கியதாக அதிகாரிகளிடம் தாம் கூறியதாக சலாம் தெரிவித்தார்.
தமது தாயாரின் நினைவுநாளை முன்னிட்டு நடைபெற இருக்கும் சடங்குகளில் கலந்துகொள்ள நவம்பர் மாதம் இந்தியாவுக்குப் பயணம் மேற்கொள்ள சலாம் அனுமதி கேட்டிருக்கிறார்.
இதுகுறித்து விண்ணப்பம் செய்ய நவம்பர் 13ஆம் தேதியன்று அவர் நீதிமன்றம் செல்வார்.
குற்றம் நிரூபிக்கப்பட்டால் சலாமிற்கு ஐந்து ஆண்டுகள் வரை சிறைத் தண்டனை, $100,000 வரை அபராதம் அல்லது இரண்டும் விதிக்கப்படலாம்.