மாணவர் முரசு
இ-பேப்பர்
அடுத்த ஆண்டிலிருந்து 40 பெருவிரைவு ரயில் (எம்ஆர்டி) நிலையங்களில் புதிய ஓவியங்கள் சேர்க்கப்படவுள்ளன.
வடக்கு-தெற்கு, கிழக்கு-மேற்கு ரயில் பாதைகளில் உள்ள 40 நிலையங்களில் புதிய ஓவியங்கள் சேர்க்கப்படும்.
இந்நடவடிக்கையின் முதற்கட்டமாக பூகிஸ், நொவீனா, ஊட்ரம் பார்க் நிலையங்களில் புதிய ஓவியங்கள் இணைக்கப்படும். இந்நிலையங்களுக்கு அருகே அமைந்துள்ள சுகாதாரப் பராமரிப்பு நிலையங்களுக்குப் போகும் பயணிகளுக்கு இந்த ஓவியங்கள் உற்சாகமூட்டும் என்று நிலப் போக்குவரத்து ஆணையம் செவ்வாய்க்கிழமை (அக்டோபர் 21) கூறியது.
பூகிஸ் நிலையத்துக்கு அருகே ராஃபிள்ஸ் மருத்துவமனை அமைந்துள்ளது. டான் டோக் செங் மருத்துவமனை, நொவீனா நிலையத்துக்கு அருகிலும் சிங்கப்பூர் பொது மருத்துவமனை, ஊட்ரம் பார்க் நிலையத்துக்கு அருகிலும் அமைந்துள்ளன.
நிலப் போக்குவரத்து ஆணையத்தின் பொதுப் போக்குவரத்தில் கலைப்படைப்புக் காட்சித் திட்டத்தின்கீழ் (Art in Transit) இந்நடவடிக்கை எடுக்கப்படுகிறது. இத்திட்டத்தின்கீழ் இதுவரை 112 எம்ஆர்டி நிலையங்களில் 500க்கும் அதிகமான ஓவியப் படைப்புகள் இடம்பெற்றுள்ளதாக ஆணையத்தின் இணையத்தளத்தில் தெரிவிக்கப்பட்டுள்ளது.
இப்போது இத்திட்டம் மேலும் 40 நிலையங்களுக்கு நீட்டிக்கப்படுகிறது. அவற்றில் 25ல் சமூக ஓவியப் படைப்புகள் இடம்பெறும். எஞ்சிய 15ல், அந்தந்த அக்கம்பக்கத்து வட்டாரங்களுக்கு இருக்கும் தனிச்சிறப்பைச் சித்திரிக்கும் புதிய ஓவியப் படைப்புகள் சேர்க்கப்படும்.
புதிய ஓவியப் படைப்புகளில் ஒன்று லிட்டில் இந்தியா நிலையத்தில் இடம்பெற்றுள்ளது. போக்குவரத்துத் துணை அமைச்சர் பே யாம் கெங் செவ்வாய்க்கிழமை அதனை வெளியிட்டார்.
நிலப் போக்குவரத்து ஆணையத்தின் 30வது ஆண்டு நிறைவைக் கொண்டாடும் வண்ணம் இந்நிகழ்வு இடம்பெற்றது.
