பணக்கார வாடிக்கையாளர்கள், நிறுவனங்களுக்கு ஓசிபிசியின் நேரடித் தங்க வணிகம்

தொடர்ச்சியான புவிசார் அரசியல் பதற்றங்கள் மற்றும் பொருளியல் நிச்சயமற்ற தன்மைக்கு மத்தியில் சிங்கப்பூரில் தங்கக் கட்டிகளை வைத்திருப்பதற்கான தேவை அதிகரித்து வருவதால், பணக்கார முதலீட்டாளர்கள் விரைவில் ஓசிபிசி வங்கியுடன் நேரடியாகத் தங்கக் கட்டிகளை வாங்கிச் சேமித்து வைக்க முடியும்.

இந்தச் சேவை ஜூன் 10ஆம் தேதி முதல் ஓசிபிசியின் நிறுவன வாடிக்கையாளர்களுக்கும், அதன் தனியார் வங்கிப் பிரிவான பேங்க் ஆஃப் சிங்கப்பூரின் உயர் நிகர மதிப்பு மற்றும் மிக உயர் நிகர மதிப்பு வாடிக்கையாளர்களுக்கும் கிடைக்கும்.

இந்நடவடிக்கை, வங்கி தனது தற்போதைய காகிதத் தங்கச் சேவைகளைத் தாண்டி, நேரடித் தங்க வணிகத்தில் நுழைவதைக் குறிக்கிறது.

வாடிக்கையாளர்கள் ஒரு கிலோ தங்கக் கட்டிகளையோ அல்லது 12.4 கிலோ எடையுள்ள பெரிய 400-டிராய்-அவுன்ஸ் கட்டிகளையோ வாங்க முடியும். இந்தக் கட்டிகள் தனித்தனியாக ஒதுக்கப்பட்டு, வரிசை எண்களால் அடையாளப்படுத்தப்படும். இது முதலீட்டாளர்களுக்கு ஒரு திரட்டப்பட்ட இருப்பின் மீதான உரிமைகோரலுக்குப் பதிலாக, குறிப்பிட்ட கட்டிகளின் நேரடி உரிமையை வழங்கும்.

இந்தப் புதிய சேவையானது, முன்பு அமெரிக்காவைச் சேர்ந்த ஒரு நிறுவனம் மூலம் தங்கப் பரிவர்த்தனைகளைச் செய்து வந்த சிங்கப்பூர் வங்கியின் வாடிக்கையாளர்களை, அதற்குப் பதிலாக ஓசிபிசி வழியாக அவ்வாறு செய்ய அனுமதிக்கும். அந்த அமெரிக்க நிறுவனத்தை அடையாளம் காட்ட வங்கி மறுத்துவிட்டது.

முந்தைய ஏற்பாட்டின் கீழ் இருந்த தங்கக் கட்டிகளின் கையிருப்பு, 2025ஆம் ஆண்டின் இறுதி முதல் 40 விழுக்காட்டுக்கும் மேலாக வளர்ந்துள்ளது என்றும் அந்தச் சொத்துக்களில் பெரும்பகுதி மிக அதிக நிகர மதிப்புள்ள வாடிக்கையாளர்களுடையது என்றும் சிங்கப்பூர் வங்கி கூறியது.

ஆனால், அதிகரித்த புவிசார் அரசியல் பதற்றங்கள் மற்றும் பொருளியல் நிச்சயமற்ற தன்மைக்கு மத்தியில், அதன் வாடிக்கையாளர்கள் தங்கக் கட்டிகளை உள்நாட்டிலேயே வைத்திருக்கவும், சிங்கப்பூரைச் சேர்ந்த நிறுவனங்கள் மூலம் பரிவர்த்தனை செய்யவும் அதிகளவில் விருப்பம் தெரிவித்து வருகின்றனர்.

தங்கக் கட்டிகளின் நேரடி உரிமையை விரும்புவோர், தங்க வியாபாரிகள் மற்றும் வங்கிகளிடமிருந்து தங்கக் கட்டிகளையும் நாணயங்களையும் நேரடியாக வாங்கலாம். இருப்பினும் சேமிப்பு மற்றும் காப்பீட்டுக் கட்டணங்கள் விதிக்கப்படலாம்.