மாணவர் முரசு
இ-பேப்பர்
பாட்டாளிக் கட்சியின் மத்திய செயற்குழுவுக்கு 12 பேர் புதிதாகத் தேர்ந்தெடுக்கப்பட்டுள்ள நிலையில், அதன் தலைமைச் செயலாளர் பிரித்தம் சிங் மீண்டும் அதே பதவிக்குத் தேர்ந்தெடுக்கப்பட்டுள்ளார்.
அத்துடன், சில்வியா லிம் கட்சியின் தலைவராக மீண்டும் பொறுப்பேற்கிறார்.
“இது நல்லதொரு தேர்தல்; இதன் முடிவு எனக்கு மிகவும் மகிழ்ச்சி அளிக்கிறது,” என்று திரு சிங் செய்தியாளர்களிடம் தெரிவித்தார். தமது பதவிக்குப் போட்டியாளர்கள் யாரும் இல்லை என்பதை அவர் உறுதிப்படுத்தினார்.
“மத்திய செயற்குழுவின் உறுப்பினர்களாகப் பொறுப்பேற்கத் தயாராகி வந்த பல நல்ல நபர்களை நாங்கள் ஏற்றுக்கொண்டுள்ளோம்,” என்று திரு சிங் கூறினார்.
கடந்த ஆண்டு பொதுத்தேர்தலில் பொங்கோல் குழுத்தொகுதியில் வேட்பாளராகப் போட்டியிட்ட ஹர்பிரீத் சிங், கட்சியின் மத்திய செயற்குழுவின் ஒரே புதுமுகமாகத் தெரிவு செய்யப்பட்டுள்ளார்.
நாடாளுமன்றத்தின் எதிர்க்கட்சித் தலைவர் பதவி குறித்த கட்சியின் நிலைப்பாட்டை இந்த முடிவு மாற்றுமா என்று கேட்கப்பட்டதற்கு, எதிர்க்கட்சித் தலைவர் பதவியானது தம் கட்சியால் தீர்மானிக்கப்படுவதில்லை என்று அவர் கூறினார்.
“இதற்கான முடிவைப் பிரதமர் எடுக்கிறார். அவர் ஏற்கெனவே தமது முடிவை எடுத்துவிட்டார் என்று நான் நம்புகிறேன்,” என்றார் திரு சிங்.
முதல் சிறப்புக் கூட்டத்தின்போது இருந்த சூழல் குறித்துக் கேட்கப்பட்டதற்கு, அது நேர்த்தியுடன் நடத்தப்பட்ட ஒரு கூட்டம் என்றும் அவர் குறிப்பிட்டார்.
பகுத்தறிவுடனும் பொறுப்புடனும் நடந்துகொண்டு சிங்கப்பூரர்களை உண்மையாகப் பிரதிநிதிப்பதே தமது நோக்கம் எனத் தம் கட்சி புரிந்துகொள்வதாகவும் திரு சிங் கூறினார்.
“நாங்கள் அதைத் தொடர்ந்து செய்ய விரும்பினால், எந்தவொரு நியாயமான, மரியாதைக்குரிய அரசியல் கட்சியும் செய்ய வேண்டியதைப் போல நாமும் கருத்து வேறுபாடுகளைக் களைந்து ஒன்றிணைந்து செயல்பட வேண்டும் என்று நான் நினைக்கிறேன்,” என்று அவர் கூறினார்.
110 சிறப்புத் தொண்டர்கள் பங்கேற்ற கூட்டத்தின் நெறியாளராகச் செயல்பட்ட ஜெரால்ட் கியாம், பெரும்பான்மையான தொண்டர்கள் பிரித்தம் சிங் தலைமைச் செயலாளராகத் தொடர வாக்களித்ததாக அறிவித்தார். 2025 டிசம்பரில் தமக்குத் தண்டனைகளை விதித்த நீதிமன்றத்தின் முடிவு குறித்துத் திரு சிங் தொண்டர்களுக்கு விளக்கமளித்ததாகத் திரு கியாம் கூறினார்.
தொண்டர்கள் தாங்கள் கேட்க விரும்பிய அனைத்துக் கேள்விகளையும் அவரிடம் கேட்பதற்கான வாய்ப்பு வழங்கப்பட்டது என்றும் அதன் பிறகு வாக்கெடுப்பு நடத்தப்பட்டது என்றும் திரு கியாம் மேலும் கூறினார்.
