இணையத்தில் விற்பனை: குழந்தைகளுக்கான பொருள்களில் பாதுகாப்புக் குறைபாடு

இணையவழி விற்கப்படும் குழந்தைகளின் தொட்டில்கள், அணிகலன்கள், தள்ளுவண்டிகள் போன்ற பொருள்களில் பாதுகாப்புக் குறைபாடுகள் இருப்பதாகச் சிங்கப்பூர்ப் போட்டித்தன்மை, பயனீட்டாளர் ஆணையம் வியாழக்கிழமை (நவம்பர் 13) தெரிவித்தது.

ஆணையமும் பயனீட்டாளர் பொருள்களுக்கான பாதுகாப்பு அலுவலகமும் இணைந்து நடத்திய சந்தைக் கண்காணிப்பில் இத்தகவல் தெரிய வந்ததாக ஆணையம் வெளியிட்ட அறிக்கையில் தெரிவித்தது.

இவ்வாண்டு முழுவதும், ‘ஷாப்பி’, ‘லசாடா’ போன்ற இணைய சில்லறை விற்பனைத் தளங்களில் விற்கப்படும் 22 தயாரிப்புகளைப் பயனீட்டாளர் பொருள்களுக்கானப் பாதுகாப்பு அலுவலகம் வாங்கி சோதனை செய்தது.

அவற்றில், 17 தயாரிப்புகள் பாதுகாப்புத் தரநிலைகளைப் பூர்த்தி செய்யாததால் அவை பாதுகாப்பற்றவை எனக் கண்டறியப்பட்டதாகச் சிங்கப்பூர்ப் போட்டித்தன்மை, பயனீட்டாளர் ஆணையம் கூறியது.

பாதுகாப்பற்றவையாக வகைப்படுத்தப்பட்டுள்ள குழந்தை தொட்டில்களில் உடைகள் சிக்கிக்கொள்ளக்கூடிய இடங்கள், கழுத்து இறுக்கப்படும் அபாயங்கள் போன்ற ஆபத்துகளைக் கொண்டிருப்பது சோதனையில் தெரியவந்ததாக அது குறிப்பிட்டது.

இதற்கிடையில், குழந்தைகள் தள்ளுவண்டிகளில் சீரற்ற மேற்பரப்புகளைக் கடந்து செல்லும்போது உடையும் அபாயம் கொண்ட சக்கரங்கள் இருப்பதும் அல்லது போதுமான கட்டுப்பாட்டு அமைப்புகள் இல்லாததும் கண்டறியப்பட்டன.