மாணவர் முரசு
இ-பேப்பர்
சிங்கப்பூர், தடுப்பு, தனிப்பயனாக்கப்பட்ட சிகிச்சைகளுக்கான மரபணுக்களை வரைபடமாக்குவதற்கான அதன் தேசிய திட்டத்தின் மூன்றாம் கட்டத்தைத் தொடங்கியுள்ளது. இது சுகாதாரப் பராமரிப்பு அமைப்புகளிலிருந்து நேரடியாக ஆட்சேர்ப்பு செய்யப்பட்ட 400,000 முதல் 450,000 நோயாளிகள் வரையிலான தரவுகளைச் சேகரிப்பதை நோக்கமாகக் கொண்டுள்ளது.
துல்லிய மருத்துவம் என்பது நோய் சிகிச்சை மற்றும் தடுப்புக்கான ஓர் இலக்கு கொண்ட அணுகுமுறையாகும். இது மரபணுக்கள், சுற்றுப்புறங்கள் மற்றும் வாழ்க்கை முறைகளில் உள்ள தனிப்பட்ட வேறுபாடுகளைக் கணக்கில் எடுத்துக்கொள்கிறது.
2025 முதல் 2031ஆம் ஆண்டு வரை நடைபெறும் தேசியத் துல்லிய மருத்துவத் திட்டத்தின் மூன்றாம் கட்டம், பல்வேறு சுகாதார நிலைமைகளைக் கொண்ட நோயாளிகளைச் சேர்த்துக்கொள்ளும். இதன் மூலம் ஆராய்ச்சியாளர்கள் மரபணு, வாழ்க்கைமுறை, சுற்றுச்சூழல் காரணிகள் உண்மையான உலக மருத்துவ அமைப்புகளில் எவ்வாறு தொடர்புகொள்கின்றன என்பதை ஆய்வு செய்ய முடியும்.
இது நோய் முன்னேற்றத்தைப் பற்றிய புரிதலை ஆழமாக்கும். இதனால் அவர்கள் சிகிச்சையைத் தனிப்பயனாக்கலாம். இறுதியில் ஒவ்வொரு நோயாளிக்கும் தனிப்பட்ட பராமரிப்பை வழங்க முடியும்.
ஒரு பெரிய மாதிரி அளவைக் கொண்டிருப்பது, அரிதான நோய்களையும் மக்கள்தொகையில் குறைவான பொதுவான மரபணு மாறுபாடுகளைக் கண்டறியவும் உதவும்.
“நோய்க்கு எதிர்வினையாற்றும் ஓர் அமைப்பிலிருந்து, அதை முன்னறிவித்து, தடுத்து, இறுதியில் ஆரோக்கியத்தைப் பாதுகாக்கும் ஓர் அமைப்பிற்கு நாம் மாற வேண்டும்,” என்று வெள்ளிக்கிழமை (நவம்பர் 14) மெரினா ஒன் வெஸ்ட் டவரில் நடந்த தொடக்க விழாவில் சுகாதார அமைச்சர் ஓங் யி காங் கூறினார்.
“மரபியல் பற்றிய ஆழமான உயிரியல் நுண்ணறிவுகள், செயற்கை நுண்ணறிவின் முன்கணிப்புச் சக்தி, தடுப்புப் பராமரிப்பு, மக்கள்தொகைச் சுகாதாரக் கொள்கைகளுடன் இணைந்தால், நாம் சுகாதாரப் பராமரிப்பு முறையை மிகவும் அடிப்படையான முறையில் மாற்ற முடியும்,” என்றும் அவர் கூறினார்.
“இது ஒரு புதிய வகையான சுகாதாரப் பராமரிப்புக்கான அடித்தளமாகும். இது நோய்களுக்குச் சிகிச்சையளிப்பது, தனிப்பட்ட நோயாளிகளைக் குணப்படுத்துவது மட்டுமல்லாமல், மக்களை நீண்டகாலம் ஆரோக்கியமாக வைத்திருப்பதுடன், நமது மக்கள்தொகை மூப்படையும்போதுகூட மிகவும் பயனுள்ளதாகவும் நிலையானதாகவும் இருக்கும்,” என்றும் அமைச்சர் விவரித்தார்.
தொடர்புடைய செய்திகள்
அடுத்த சில ஆண்டுகளில், மூன்று சுகாதாரப் பராமரிப்புக் குழுமங்களும் தற்போதைய 100,000 பங்கேற்பாளர்களுக்கு மேல், மேலும் 400,000 முதல் 450,000 பங்கேற்பாளர்களைச் சேர்த்துக்கொள்ளும்.
மூன்றாம் கட்டம் முடிவடையும் போது, 500,000க்கும் மேற்பட்ட பங்கேற்பாளர்கள், அதாவது சிங்கப்பூரின் உள்ளூர்வாசி மக்கள்தொகையில் சுமார் 10 விழுக்காட்டினர் தங்கள் முழு மரபணுவை வரிசைப்படுத்தி இருப்பார்கள் என்று தெரிவிக்கப்பட்டது.