மாணவர் முரசு
இ-பேப்பர்
ஈஸ்ட் கோஸ்ட் பூங்கா கடற்கரையில் நீந்துவதையும் பிற நீர் நடவடிக்கைகளில் ஈடுபடுவதையும் தவிர்க்கும்படி தேசியச் சுற்றுப்புற வாரியம் அறிவுறுத்தியுள்ளது.
சிங்கப்பூரில் பதிவுசெய்யப்பட்ட எண்ணெய்க் கப்பலும் மால்டாவில் பதிவுசெய்யப்பட்ட சரக்குக் கப்பலும் மோதிக்கொண்ட சம்பவத்தை அடுத்து வாரியம் அந்த அறிக்கையை வெளியிட்டது.
தானா மேராவுக்குக் கிழக்கில் கிட்டத்தட்ட 8 கிலோமீட்டர் தொலைவில் மரின் டைனமோ என்ற சிங்கப்பூர் எண்ணெய் கப்பலும் ஃபிலேக் காங்கோஸ் என்ற மால்டா சரக்குக் கப்பலும் திங்கட்கிழமை (செப்டம்பர் 1) காலை 9.25 மணியளவில் மோதிக்கொண்டன.
இரண்டு கப்பல்களும் சீரான நிலையில் இருப்பதாகச் சிங்கப்பூர்க் கடல்துறை, துறைமுக ஆணையம் குறிப்பிட்டது.
மரின் டைனமோ கப்பலில் இருந்த ஊழியர் ஒருவருக்கு லேசான சிராய்ப்புகளுடன் சுளுக்கும் ஏற்பட்டதாக ஆணையம் சொன்னது. பாதிக்கப்பட்ட அந்த ஊழியருக்குக் கப்பலில் சிகிச்சையளிக்கப்படுகிறது.
மோதிக்கொண்ட இரண்டு கப்பல்களின் ஊழியர்களும் பாதுகாப்பாக உள்ளனர்.
மரின் டைனமோ கப்பலைச் சுற்றி லேசான எண்ணெய்ப் படலம் காணப்பட்டது என்ற ஆணையம், சேமிப்புத் தொட்டியின் கடல்துறை எரிவாயு எண்ணெய் (marine gas oil) நீருக்குள் கசிந்த தகவலைப் பகிர்ந்துகொண்டது. அந்த எரிவாயு எண்ணெய் கப்பல்களை இயக்கப் பயன்படுத்தப்படுகிறது.
குறிப்பிட்ட அந்த எரிவாயு எண்ணெய் டீசலுக்குச் சமம் என்றும் எளிதில் ஆவியாகக்கூடியது என்றும் ஆணையம் சுட்டியது.
தொடர்புடைய செய்திகள்
சம்பவம் குறித்து விசாரிக்க கடல்துறை, துறைமுக ஆணையம் கண்காணிப்புக் கப்பலையும் கசிவைக் கட்டுப்படுத்தும் கப்பலையும் அனுப்பியுள்ளது. அவை கடலில் கசிந்த லேசான எண்ணெய் படலத்தை அப்புறப்படுத்தும் பணியில் ஈடுபடும்.
நிலைமையைக் கண்காணிக்க ஆளில்லா வானூர்திகளும் பணியில் ஈடுபடுத்தப்பட்டுள்ளன.
பாதிக்கப்பட்ட பகுதியைக் கடந்துசெல்லும் கப்பல்களுக்கு தகவல்கள் ஒலிபரப்பப்படுகின்றன என்றும் கப்பல்கள் பாதுகாப்பாகப் பயணம் செய்யலாம் என்றும் ஆணையம் குறிப்பிட்டது.