சிங்கப்பூர் ஆயுதப்படை தின அனுசரிப்பு நிகழ்வு

2 mins read
4167e6e7-b076-4873-bfb8-4e17ae03e32b
சிங்கப்பூர் இந்தியர் வர்த்தக, தொழில் சபையின் சிங்கப்பூர் ஆயுதப்படை தின அனுசரிப்பு நிகழ்வில் கலந்துகொண்டவர்கள். - படம்: எஸ் டபிள்யு ஸ்ட்ராட்டஜிஸ்

ஜூலை 1ஆம் தேதி சிங்கப்பூர் ஆயுதப்படை தினத்தை முன்னிட்டு, சிங்கப்பூர் இந்தியர் வர்த்தக, தொழில் சபை, சிங்கப்பூர் ஆயுதப்படை தின அனுசரிப்பு நிகழ்ச்சிக்கு ஏற்பாடு செய்திருந்தது.

சிங்கப்பூர் இந்தியர் வர்த்தக, தொழில் சபையின் உறுப்பினர்களான வர்த்தகர்களும் தொழிலதிபர்களும் சேவையாளர்களை ஆதரிப்பதில் ஆற்றும் பங்கிற்கு நன்றி தெரிவிக்கவும், அவர்களிடையே மேலும் விழிப்புணர்வை ஏற்படுத்தவும் இந்த நிகழ்ச்சி நடத்தப்படுகிறது.

சிங்கப்பூர் இந்தியர் வர்த்தக, தொழில் சபையின் கட்டடத்தில் இன்று காலை 11 மணி முதல் பிற்பகல் 1 மணி வரை நடந்த இவ்வாண்டின் அனுசரிப்பு நிகழ்வில் சிறப்பு விருந்தினராக பயனியர் தனித்தொகுதியின் நாடாளுமன்ற உறுப்பினரும் தேசியத் தொழிற்சங்கக் காங்கிரசின் உதவித் தலைமைச் செயலாளருமான பேட்ரிக் தே கலந்துகொண்டார்.

முதல் அங்கமாக நிகழ்ச்சிக்‌கு வருகையளித்திருந்த அனைவரும் தேசிய கீதத்தைச் சேர்ந்து பாடி, தேசிய உறுதிமொழியையும் சிங்கப்பூர் ஆயுதப்படையின் உறுதிமொழியையும் எடுத்துக்கொண்டனர்.

சிங்கப்பூர் இந்தியர் வர்த்தக, தொழில் சபையின் தலைவரான நீல் பரேக், சிங்கப்பூரின் வணிக சமூகத்திற்கும் சிங்கப்பூர் ஆயுதப்படைக்கும் இடையே வலுவான கூட்டணி இருப்பது நாட்டின் பாதுகாப்பிற்கு மட்டுமின்றி நமது பொருளாதாரத்தின் தொடர்ச்சியான வளர்ச்சிக்‌கும் அவசியம் என்று தமது வரவேற்புரையில் கூறினார்.

“வலுவான பொருளாதாரம் நாட்டின் பாதுகாப்பிற்கு வலுவான ஆதரவை அளிக்கும்,” என்றார் அவர். மேலும், சிங்கப்பூர் ஆயுதப்படையில் போர்க்காலப் படைவீரர்களாகச் சேவையாற்றும் தங்களது ஊழியர்களுக்‌குத் தொடர்ந்து ஆதரவளிக்க தாங்கள் உறுதியுடன் இருப்பதாகவும் திரு நீல் குறிப்பிட்டார்.

அவரைத் தொடர்ந்து உரையாற்றிய திரு பேட்ரிக், நிறைய போர்க்காலப் படைவீரர்களுக்‌கு அன்றாட வேலை இருப்பதால், அவர்கள் தொடர்ந்து தேசிய சேவை செய்வதற்கு அவர்களின் நிறுவனங்களின் பங்கு மிக முக்‌கியம் என்று சொன்னார்.

“சிங்கப்பூரின் பாதுகாப்பு என்பது அரசாங்கத்தின் அல்லது இராணுவத்தின் பொறுப்பு மட்டுமல்ல. அது நமது சமூகத்தின் ஒவ்வோர் உறுப்பினரையும் உள்ளடக்கிய ஒரு கூட்டு முயற்சியாகும்,” என்றார் அவர்.

மேலும், “சிங்கப்பூரின் பாதுகாப்பு தற்போது சிறப்பாக உள்ளது. அது தொடர்வதற்கும், நமது எதிர்கால வெற்றிகளுக்‌கும், நமது தேசிய பாதுகாப்பின் தூணாக இருக்‌கும் சிங்கப்பூர் ஆயுதப் படை தொடர்ந்து வலுப்பெற வேண்டும்,” என்றும் அவர் சொன்னார்.

இவ்வாண்டின் சிங்கப்பூர் ஆயுதப் படை தினத்திற்காகத் தயாரிக்‌கப்பட்ட சிறப்புக் காணொளி ஒன்றும் நிகழ்ச்சியில் காண்பிக்கப்பட்டது.

குறிப்புச் சொற்கள்