மாணவர் முரசு
இ-பேப்பர்
மலேசியாவில் உள்ள பெட்ரோல் நிலைய ஊழியர் ஒருவர், மானிய விலையில் வழங்கப்படும் ரோன்95 ரகப் பெட்ரோலை நிரப்பிய சிங்கப்பூர் பதிவெண் கொண்ட கார் ஓட்டுநரைத் தடுப்பது ஒரு காணொளியில் பதிவாகியுள்ளது.
‘மலேசியா-சிங்கப்பூர் பார்டர் கிராஸர்ஸ்’ என்ற ஃபேஸ்புக் குழுவால் பதிவிடப்பட்ட ஒரு காணொளியின்படி, இந்தச் சம்பவம் சனிக்கிழமையன்று (ஜூன் 20) சிலாங்கூர், கிள்ளானில் உள்ள ஒரு பெட்ரோல் நிலையத்தில் நடந்ததாகக் கூறப்படுகிறது.
அந்தக் காணொளியில், சிங்கப்பூர் பதிவெண் கொண்ட ஒரு ஆவ்டி கார் எரிபொருள் நிரப்பும் இடத்தில் நிறுத்தப்பட்டிருப்பதும், அதன் ஓட்டுநர் என்று நம்பப்படும் ஒருவர் வாகனத்தின் அருகே நிற்பதும் தெரிகிறது.
காணொளியின் பாதியில், எரிபொருள் நிரப்பும் பணியாளர் ஒருவர் காரை அணுகி, காரின் எரிபொருள் நிரப்பும் பகுதியிலிருந்து எரிபொருள் குழாயை அகற்றுவதற்கு முன்பு ஓட்டுநரிடம் பேசுவது போல் தெரிகிறது.
அந்த மஞ்சள் நிறக் குழாய், ஓட்டுநர் ரோன்95 ரகப் பெட்ரோலை நிரப்பிக் கொண்டிருந்ததை காட்டுகிறது. இது மலேசிய அரசாங்கத்தால் மானியம் வழங்கப்பட்டு, மலேசியாவில் பதிவு செய்யப்பட்ட வாகனங்களுக்காக ஒதுக்கப்பட்டது.
பணியாளர் சைகை காட்டியபோது, ஓட்டுநர் தனது பணப்பையைத் துழாவிக் கொண்டிருந்தது காணப்பட்டது. பணியாளர் தலையிடுவதற்கு முன்பு எரிபொருள் நிரப்பப்பட்டதா என்பது காணொளியில் தெளிவாகத் தெரியவில்லை.
ஓட்டுநரை விமர்சித்த இணையவாசிகள்
சிங்கப்பூரில் பதிவுசெய்யப்பட்ட வாகனங்கள் மானிய விலையில் எரிபொருள் நிரப்ப முயற்சிக்கும் சம்பவங்கள் மீண்டும் மீண்டும் நடப்பதால், பல இணையவாசிகள் தங்கள் விரக்தியை வெளிப்படுத்தியதில், இந்தச் சம்பவம் இணையத்தில் விமர்சனங்களை ஈர்த்துள்ளது.
விதிமீறுபவர்கள் “திரும்பிப் பாடம் கற்பதாகத் தெரியவில்லை” என்று ஓர் இணையவாசி குறிப்பிட்டிருக்க, மற்றொருவர், “ஒவ்வொரு நாளும் ஒரு முட்டாள்தனமான காரியம்,” என்று எழுதியிருந்தார்.
தொடர்புடைய செய்திகள்
வெளிநாட்டு வாகனங்கள் மானிய விலையிலான எரிபொருள் நிரப்பும் குற்றம் நிரூபிக்கப்பட்டால், அவர்களுக்கு மூன்று ஆண்டுகள் வரை சிறைத்தண்டனை, ஒரு மில்லியன் ரிங்கிட் ($313,700) வரை அபராதம் அல்லது இரண்டும் விதிக்கப்படலாம்.