மாணவர் முரசு
இ-பேப்பர்
உள்ளூர்த் தொழில்நுட்பச் சேவைகள் நிறுவனமான என்சிஎஸ் (NCS) செயற்கை நுண்ணறிவு மதிநுட்பச் சொத்தை உருவாக்குவதோடு செயற்கை நுண்ணறிவுத் துறைக்கான முன்னோடித் திட்டங்களை அமைக்கவும் ஊழியரணிக்குப் பயிற்சி அளிக்கவும் அடுத்த மூவாண்டுகளில் $130 மில்லியன் முதலீட்டைச் செய்யவிருக்கிறது.
செயற்கை நுண்ணறிவுத் தொழில்நுட்பம் மூலம் சிறிய நிறுவனங்களும் பயனடைய என்சிஎஸ் உதவ முடியும் என்று துணைப் பிரதமர் கான் கிம் யோங் கூறினார்.
மெரினா பே சாண்ட்ஸில் நடைபெற்ற என்சிஎஸ் இம்பெக்ட் (NCS Impact) மாநாட்டில் திரு கான் பேசினார்.
“செயற்கை நுண்ணறிவுத் தீர்வுகளை வழங்குவதற்கு அப்பால் பங்காளி நிறுவனங்களுடன் இணைந்து செயல்முறைகளை உருவாக்கி வர்த்தக மாதிரிகளையும் மாற்றியமைக்கலாம்,” என்றார் அவர்.
புத்தாக்கங்களுடன் சிங்கப்பூர் முன்னேறும் வேளையில் செயற்கை நுண்ணறிவுத் தொழில்நுட்பத்தின் அனுகூலங்கள் பரவலாக அனுபவிக்கப்படுவதை உறுதிசெய்யவேண்டும் என்று திரு கான் குறிப்பிட்டார்.
சிறிய நிறுவனங்களிலும் பெரிய நிறுவனங்களிலும் செயற்கை நுண்ணறிவுத் தொழில்நுட்பத்தை நிறுவுவதற்கான தேவை இருப்பதையும் திரு கான் சுட்டினார்.
கடந்த ஆண்டு வெளியிடப்பட்ட சிங்கப்பூர் மின்னிலக்கப் பொருளியல் அறிக்கையின்படி கடந்த ஐந்து ஆண்டுகளில் செயற்கை நுண்ணறிவுத் தொழில்நுட்பத்தைப் பயன்படுத்தும் பெரிய நிறுவனங்களின் எண்ணிக்கை இரட்டிப்பாகியுள்ளது.
2017ஆம் ஆண்டு 17 விழுக்காடாக இருந்த அந்த எண்ணிக்கை 2023ஆம் ஆண்டு 44 விழுக்காட்டுக்கு உயர்ந்தது.
தொடர்புடைய செய்திகள்
எனினும், செயற்கை நுண்ணறிவுத் தொழில்நுட்பத்தைப் பயன்படுத்தும் சிறிய, நடுத்தர நிறுவனங்களின் எண்ணிக்கை அதே காலக்கட்டத்தில் 3.5 விழுக்காட்டிலிருந்து 4.2 விழுக்காட்டுக்கு மட்டுமே கூடியது.
“சிறிய, நடுத்தர நிறுவனங்களிடையே செயற்கை நுண்ணறிவுப் பயன்பாடு குறைவாக இருந்தபோதும் சிறிய, நடுத்தர, பெரிய நிறுவனங்கள் அனைத்தும் செயற்கை நுண்ணறிவால் பயனடைந்ததைப் பார்க்க நிறைவாக உள்ளது,” என்றார் திரு கான்.
செயற்கை நுண்ணறிவைப் பயன்படுத்திய 90 விழுக்காட்டு நிறுவனங்கள் அதன் மூலம் உற்பத்தியும் செயல்முறைகளும் மேம்பட்டதாகக் குறிப்பிட்டன.