பொதுத் தேர்தலில் பாரம்பரிய ஊடகங்களின் மின்னிலக்கத் தளங்களை அதிகம் நாடிய சிங்கப்பூரர்கள்

சிங்கப்பூரில் இவ்வாண்டு நடந்து முடிந்த பொதுத் தேர்தலின்போது தகவல்களை அறிய, பாரம்பரிய ஊடகங்களின் இணையத்தளங்கள், கைப்பேசிச் செயலிகள், வலையொளிகள் போன்றவற்றையே சிங்கப்பூரர்கள் அதிகம் நாடியதாக ஆய்வு ஒன்று தெரிவித்து உள்ளது.

இதற்கு முன்னர், தேர்தல் தொடர்பான தகவல்களுக்கு சமூக ஊடகம், தொலைக்காட்சி போன்ற வழிகளை நாடிய பெரியோரும் இளையர்களும் இம்முறை ஸ்ட்ரெய்ட்ஸ் டைம்ஸ், சாவ்பாவ், சேனல் நியூஸ் ஏஷியா (CNA) போன்ற செய்தி நிறுவனங்களின் மின்னிலக்கத் தளங்களைப் பயன்படுத்தியதாக அந்த ஆய்வு குறிப்பிட்டு உள்ளது.

இணையம் வாயிலாக மே 5ஆம் தேதி முதல் 20ஆம் தேதி வரை நடத்தப்பட்ட அந்த ஆய்வில் 2,071 பேர் கலந்துகொண்டு கருத்துகளைத் தெரிவித்தனர்.

கொள்கை ஆய்வுக் கழகமும் சிங்கப்பூர் தேசியப் பல்கலைக்கழகத்தின் தொடர்பு மற்றும் புதிய ஊடகத் துறையும் இணைந்து ஆய்வை நடத்தின. ஆய்வின் முடிவுகள் இன்று (செப்டம்பர் 2) வெளியிடப்பட்டன.

மின்னிலக்க காலத்திற்கு முன் தோன்றி, காலம் காலமாக உள்ளூரில் வேரூன்றிய பாரம்பரிய ஊடகங்கள் மின்னிலக்க உருமாற்றம் மற்றும் புத்தாக்கம் வழி பலனடைந்துள்ளதை ஆய்வு சுட்டியது.

வாக்காளர்களையும் வாசகர்களையும் கவர, பாரம்பரிய முறைகளைத் தாண்டி பல்வேறு வழிகளை அந்த ஊடகங்கள் கடைப்பிடித்தன.

அவற்றின் கைப்பேசிச் செயலி, வலையொளி போன்ற மின்னிலக்கத் தளங்களை தினமும் ஒருமுறை அல்லது பலமுறைப் பயன்படுத்தியதாக, ஆய்வில் பங்கேற்றோரில் 49 விழுக்காட்டினர் கூறினர்.

பொதுத் தேர்தல் 2025 தகவல்களைப் பெறுவதற்கான தலைசிறந்த தளங்களாக அவை விளங்கியதை ஆய்வு கண்டறிந்தது.

தொடர்புடைய செய்திகள்

வயதுக்கேற்ற உள்ளடக்கங்கள் பற்றி சமூக ஊடகங்களுடன் அரசாங்கம் ஆய்வு

அதற்கு அடுத்தபடியாக, தொலைக்காட்சித் தகவல்களை நாடியதாக 43.5 விழுக்காட்டினர் கூறினர். 

‘ரைஸ் மீடியா’, ‘மதர்ஷிப்’, ‘த ஆன்லைன் சிட்டிசன்’ போன்றவற்றின் மின்னிலக்கத் தளங்களை நாடியதாக 39 விழுக்காட்டினர் தெரிவித்தனர்.

ஐந்தாண்டுகளுக்கு முன்னர், 2020 பொதுத் தேர்தலின்போது அது தொடர்பான தகவல்களை அறிய 21க்கும் 34க்கும் இடைப்பட்ட இளையர்கள் பெரும்பாலும் சமூகக் கட்டமைப்புத் தளங்களையும் 60 வயதுக்கு மேற்பட்டவர்கள் தொலைக்காட்சியையும் பயன்படுத்தினர்.

இவ்வாண்டு தேர்தலில் பங்கேற்ற வாக்காளர்களில் 74 விழுக்காட்டினர் தேர்தல் தொடர்பான தகவல்களைத் தெரிந்துகொள்ள அளவுக்கதிகமான நாட்டம் காட்டியதையும் ஆய்வு கண்டறிந்தது.

2020 பொதுத் தேர்தலுக்குப் பின்னர் நடத்தப்பட்ட ஆய்வில் அந்த விகிதம்  66 விழுக்காடாக இருந்தது.