மாணவர் முரசு
இ-பேப்பர்
நன்யாங் தொழில்நுட்பப் பல்கலைக்கழகம் ஒன்பது புதிய இளங்கலைக் கல்வித் திட்டங்களை நேற்று அறிமுகம் செய்தது. வளர்ந்து வரும் துறைகளான வர்த்தகம், பொறியியல், அறிவியல் ஆகிய துறைகளில் அறிமுகப்படுத்தப்பட்ட இந்த திட்டங்களில் வரும் ஆகஸ்ட் மாதம் முதல் மாணவர்கள் தேர்ந்தெடுத்து படிக்கலாம். இவற்றில் இரு சிறப்பு ஒருங்கிணைந்த திட்டங்களும் அடங்கும். அவ்விரு திட்டங்களிலும் மாணவர்கள் 'ஹானர்ஸ்' பட்டத்தையும் நிதி பொறியியல் துறையில் முதுகலைப் பட்டத்தையும் நான்கு ஆண்டுகளில் பெறலாம். அவர்கள் நான்காம் ஆண்டில் பயிலும்போது அமெரிக்காவின் 'கார்னகி மெல்லன் பல்கலைக் கழகத்தில் மாணவர் பகிர்வுத் திட்டத்திலும் கலந்துகொள்வார்கள். அங்குள்ள பாடத்திட்டங்களில் பயின்று அவற்றை வெற்றிகரமாக முடித்த பிறகு அந்தப் பல்கலைக்கழகத்தின் 'கம்பியூடேஷனல் ஃபைனான்ஸ்' சான்றிதழையும் மாணவர்கள் பெறுவர்.
இது தவிர, வர்த்தகம் அல்லது கணக்கியல் பாடத்தை முக்கியப் பாடமாகவும் உத்திபூர்வ தகவல் தொடர்பை துணைப்பாடமாகவும் பயிலக்கூடிய இரு இளங்கலைக் கல்வித் திட்டங்களையும் நன்யாங் தொழில்நுட்பப் பல்கலைக்கழகம் புதிதாக வழங்கும். பொறியியல் அல்லது அறிவியல் பாடத்தில் ஆர்வம் உள்ள மாணவர்கள் அத்துறைகளில் கூடுதலாக ஐந்து திட்டங்களை எதிர்பார்க்கலாம். பொறியியல், அறிவியல் பாடங்களை முக்கியப் பாடமாகவும் வளர்ந்து வரும் துறைகளான மருந்தகப் பொறியியல், உணவு அறிவியல் தொழில்நுட்பம், மருத்துவ உயிரியல், 'பயோமெடிக்கல்ஸ் மெட்டீரியல்ஸ்' பொறியியல் ஆகியவற்றை இரண்டாம் முக்கியப் பாடமாகவும் பயிலக்கூடிய ஐந்து புதிய பாடத்திட்டங்களையும் பல்கலைக்கழகம் வழங்குகிறது. ஒன்பது புதிய பாடத்திட்டங்களுடன் நன்யாங் தொழில்நுட்பப் பல்கலைக்கழகம் இந்த ஆண்டில் மொத்தம் 103 இளங்கலைப் பாடத்திட்டங்களை வழங்குகிறது. மேல் விவரங்களுக்கு http://www.ntu.edu.sg/ இணையத்தளத்தை நாடலாம்.