பயிற்சியின் வேகம் குறைக்கப்படவுள்ளது

சிங்கப்பூர் ஆயுதப் படையின் முப்படை­களில் வழங்கப்படும் பயிற்சியின் வேகம் குறைக்கப்படவுள்ளது.
பாதுகாப்பில் அதிக கவனம் செலுத்தும் நோக்கில் பயிற்சி செயல்­முறைகளை மறுஆய்வு செய்வதற்காக படைத் தளபதிகளுக்கும் துருப்பு­களுக்கும் காலஅவகாசம் வழங்கப்படும்.
நியூசிலாந்தில் நடைபெற்ற ராணுவப் பயிற்சி ஒன்றில் படுகாயமடைந்த உள்ளூர் நடிகர் அலோய்‌ஷியஸ் பாங், பின்னர் சிகிச்சை பலனின்றி உயிர் இழந்தார். அவரது மரணத்தைத் தொடர்ந்து நேற்று நடைபெற்ற செய்தி­யாளர் கூட்டத்தில் தற்காப்புப் படை தலைவர் மெல்வின் ஓங் மேற்கண்ட நடவடிக்கை பற்றி அறிவித்தார்.
"பாதுகாப்பில் அதிக கவனம் செலுத்தும் நோக்கில் பயிற்சியின் வேகத்தைக் குறைப்பது குறித்த நடை­முறைகளை மறுஆய்வு செய்யுமாறு முப்படைகளையும் நான் அறிவுறுத்தி உள்ளேன்," என்று லெஃப்டினெண்ட்=­ஜெனரல் ஓங் கூறி­னார்.
பயிற்சியின் வேகம் குறைக்கப்படு­வதால் ஆயுதப் படையின் செயல்பாட்டு ஆக்கத்திறன் பாதிக்கப்படாது என்ற உத்தரவாதத்தை அவர் வழங்கினார்.
தயார்நிலை தேசிய சேவையாளராக இருந்த 28 வயது முதல் வகுப்பு கார்ப்பரல் பாங்கின் மரணத்திற்கு காரணமான சூழல் குறித்த மேல் விவ­ரங்கள் நேற்றைய கூட்டத்தில் பகிரப்­ பட்டன.
முழுநேர தேசிய சேவைக்குப் பிந்திய ராணுவப் பயிற்சியின் ஓர் அங்கமாக, கடந்த சனிக்கிழமை நியூசிலாந்தின் 'வையோரு' பயிற்சித் தளத்தில் சிங்கப்பூரில் தயாரிக்கப்பட்ட 'ஹவிட்­ஸர்' கவச வாகனத்திற்குள் பழுது­ பார்ப்புப் பணிகளை பாங் மேற்கொண்டு இருந்தார். அப்போது கவச வாக­னத்தின் பீரங்கி இறக்கப்பட்டபோது பாங் அதில் நசுங்கி படுகாயமுற்றார். இதில் அவரது நுரையீரல்கள், இதயம், சிறுநீரகம் கடுமையாகக் காயமடைந்தன.
அவருக்கு மூன்று அறுவை சிகிச்­சைகள் மேற்கொள்ளப்பட்டன. பின்னர் அவரது நிலைமை மோசமடைய, செயற்கை உயிர்காப்புக் கருவிகள் பொருத்தப்பட்ட நிலையில் பாங் வைக்­ கப்பட்டிருந்தார்.
சிகிச்சை பலனின்றி கார்ப்பரல் பாங் நேற்று முன்தினம் இரவு 8.45 மணிக்கு உயிரிழந்தார்.