இன்னும் அதிகமான வீடமைப்பு வளர்ச்சிக் கழக மறுவிற்பனை வீடுகள் கடந்த ஆண்டின் நான்காம் காலாண்டில் கைமாறின. அதன் விலைகளும் சிறிதளவு ஏற்றம் கண்டன என இன்று வெளியிடப்பட்ட கழகத்தின் ஆகக் கடைசி புள்ளி விவரங்கள் தெரிவித்தன.
நான்காம் காலாண்டில் மொத்தம் 6,339 மறுவிற்பனை வீடுகள் விற்கப்பட்டன. ஒப்புநோக்க கடந்த ஆண்டின் மூன்றாம் காலாண்டில் அந்த எண்ணிக்கை 6,264 என்று இருந்தது. நான்காம் காலாண்டின் மறுவிற்பனை பரிவர்த்தனைகள் விகிதமும் 2018 நான்காம் காலாண்டைக் காட்டிலும் 12.5% அதிகமாக இருந்தது. 2019ஆம் ஆண்டு முழுமைக்கும் மறுவிற்பனை பரிவர்த்தனைகள் 2.7% அதிகரித்து, 23,714 ஆனது. 2018ஆம் ஆண்டில் இந்த எண்ணிக்கை 23,099 என்று இருந்தது.
இதற்கிடையே, கடந்த ஆண்டு மூன்றாம் காலாண்டைக் காட்டிலும் நான்காம் காலாண்டின் மறுவிற்பனை விகிதம் 0.5% அதிகரித்து, 2019ஆம் ஆண்டு முழுமைக்கும் மறுவிற்பனை விகிதத்தை அதற்கு முந்திய ஆண்டைக் காட்டிலும் 0.1% அதிகரிக்க வைத்தது.