மாணவர் முரசு
இ-பேப்பர்
சிங்கப்பூரின் உற்பத்தித் துறை உற்பத்தி தொடர்ந்து இரண்டாவது மாதமாக கடந்த ஜூன் மாதத்திலும் மந்தமாக இருந்தது. உயிரியல் மருத்துவ தொழில்துறை உற்பத்தி மிகவும் குறைந்ததே இதற்கான முக்கிய காரணமாக இருந்தது.
பொருளியல் வளர்ச்சிக் கழகம் வெளியிட்ட புள்ளிவிவரங்கள் மூலம் இந்த நிலவரம் தெரியவருகிறது. சென்ற ஆண்டு ஜூன் மாதத்துடன் ஒப்பிடுகையில், இந்த ஆண்டு ஜூனில் உற்பத்தித் துறை உற்பத்தி 6.7 விழுக்காடு இறக்கம் கண்டது.
இந்த இறக்கம், மே மாதம் 8.1% ஆக இருந்தது.
ஆனால் உயிரியல் மருத்துவத் துறையின் உற்பத்தியை நீக்கிவிட்டு பார்க்கையில் உற்பத்தித் துறை 2.1 விழுக்காடு வளர்ச்சி கண்டு இருக்கிறது என்பது குறிப்பிடத்தக்கது.
உயிரியல் மருத்துவத் துறை உற்பத்தி 30.6 விழுக்காடு குறைந்துள்ளது. கொவிட்-19 சூழலில் இந்தத் துறையைச் சேர்ந்த தொழில்நுட்பப்பிரிவு 5.9 விழுக்காடு வளர்ச்சி அடைந்தது என்றாலும் மருந்து உற்பத்திப் பிரிவு 37.4 விழுக்காடு சுருங்கிவிட்டது.
ஆண்டுக்காண்டு அடிப்படையில் பார்க்கையில், சென்ற ஆண்டு இதே மாதத்துடன் ஒப்பிடுகையில் இந்த ஆண்டு ஜூனில் உயிரியல் மருத்துவத் துறையின் உற்பத்தி 26.6% வளர்ச்சி கண்டது.
அதேபோல் மின்னணு தொழில்துறையின் உற்பத்தி 17.3 விழுக்காடு கூடியது. இதற்கு கணினிச்சில்லு உற்பத்தித் துறையே முக்கிய காரணமாக இருந்தது. இந்தத் துறை 26% விரிவடைந்தது.
இருந்தாலும் மின்னணு தொழில்துறையின் இதர பிரிவுகள் சரியாகச் செயல்படவில்லை. மொத்தத்தில் மின்னணுத் துறையின் உற்பத்தி இந்த ஆண்டின் முதல் பாதியில் 0.4 விழுக்காடு குறைந்து இருக்கிறது.
துல்லியப் பொருளியல் தொழில்துறை 9.1 விழுக்காடு விரிவடைந்தது. மொத்தத்தில் இந்தத் துறை இந்த ஆண்டின் முதல் ஆறு மாதத்தில் 11.6 விழுக்காடு வளர்ச்சி கண்டதாகத் தெரிவிக்கப்பட்டது.
ஆயினும் ரசாயனத் தொழில்துறையின் உற்பத்தி ஆண்டுக்காண்டு அடிப்படையில் கடந்த ஜூன் மாதம் 12.1% குறைந்தது.
2019 முதல் காலாண்டுடன் ஒப்பிடுகையில் இந்த ஆண்டின் முதல் பாதியில் ரசாயனத் தொழில்துறை 5.5 விழுக்காடு வீழ்ச்சி கண்டது. பொது உற்பத்தித் தொழில்துறையின் உற்பத்தியும் சென்ற மாதம் 13.9 விழுக்காடு சுருங்கியது. உணவு, பானம், சிகரெட், அச்சு உள்ளிட்ட பல துறைகளும் இறக்கம் கண்டன.
போக்குவரத்துப் பொறியியல் துறை உற்பத்தி கடந்த ஜூன் மாதம் 33.9 விழுக்காடு சுருங்கியது என்று பொருளியல் வளர்ச்சிக் கழகத்தின் புள்ளிவிவரங்கள் தெரிவிக்கின்றன.