மார்சிலிங் சமூக மன்றத்தில் டிரேஸ்டுகெதர் சாதனங்களைப் பெற்றுக்கொள்ள இன்று நீண்ட வரிசையில் மக்கள் காத்திருந்தனர்.
நேற்று இந்தச் சாதனங்களின் விநியோகம் நிறுத்தி வைக்கப்பட்டிருந்தது. ஒவ்வொரு தொகுதியிலும் குறிப்பிட்ட நாட்களில் இந்தச் சாதனங்களை விநியோகிக்க முடிவு செய்யப்பட்ட பிறகு, மார்சிலிங் சமூக மன்றத்தில் முதலில் இந்த விநியோகம் தொடங்கியது.
காலை 9.45 மணிக்கே சுமார் 100 பேர் வரிசையில் காத்திருந்தனர். காலை 11.30 மணி வரை கூட்டம் தொடர்ந்து அதிகரித்தது.
மொத்தமிருந்த 5 விநியோகக் கூடங்களில் ஒன்று மூத்தோருக்கும் உடல்நலப் பிரச்சினைகள் உடையோருக்கும் ஒதுக்கப்பட்டது. கிட்டத்தட்ட 30 நிமிடங்கள் முதல் 1 மணி நேரம் வரை மக்கள் காத்திருந்து சாதனங்களை பெற்றுச் சென்றனர்.
இன்று ஒரு நாள் மட்டுமே அங்கு டிரேஸ்டுகெதர் சாதனம் விநியோகிக்கப்படுவதாக எண்ணி இன்றே பெற்றுக்கொள்ள வந்ததாக பலர் தெரிவித்தனர்.
தீவின் மற்ற பகுதிகளில் இருக்கும் 107 சமூக மன்றங்களில் இந்த மாதம் முதல் டிசம்பர் வரை படிப்படியாக டிரேஸ்டுகெதர் சாதன விநியோகம் தொடங்கும்.
ஒவ்வொரு தொகுதியிலும் சாதனம் விநியோகிக்கப்படுவது தொடர்பான தகவல்களுக்கு Token Go Where இணையப்பக்கத்தை நாடலாம்.