மாணவர் முரசு
இ-பேப்பர்
என்டியுசி ஃபேர்பிரைஸ் நிறுவனம், தேர்ந்தெடுக்கப்பட்ட அதன் கடைகளில் பிளாஸ்டிக் பைகளுக்குக் கட்டணம் விதிக்கும் திட்டத்தை இன்று முதல் மேலும் ஓராண்டிற்கு நீட்டிக்கவிருக்கிறது.
வாடிக்கையாளர்களிடம் இருந்து இது குறித்து நல்ல வரவேற்பு கிடைத்ததைத் தொடர்ந்து இத்திட்டத்தை நீட்டிக்க முடிவெடுத்திருப்பதாக அந்நிறுவனம் தெரிவித்துள்ளது.
கடந்த ஆண்டு நவம்பரில் இத்திட்டம் தொடங்கியதை அடுத்து, இதுவரை மொத்தம் 15.6 மில்லியன் பிளாஸ்டிக் பைகள் சேமிக்கப்பட்டதாக ஃபேர்பிரைஸ் கூறியது. இந்தத் திட்டத்தில் 25 கடைகள் இணைந்து இருந்தன.
ஃபேர்பிரைஸ், ஃபேர்பிரைஸ் ஃபைனஸ்ட், ஃபேர்பிரைஸ் எக்ஸ்ட்ரா பேரங்காடிகளில் பிளாஸ்டிக் பைகள் தேவைப்படுவோர் ஒவ்வொரு பரிவர்த்தனைக்கும் 20 காசு செலுத்த வேண்டும்.
சியர்ஸ், ஃபேர்பிரைஸ் எக்ஸ்பிரஸ் பல்பொருள் அங்காடிகளில் ஒவ்வொரு பரிவர்த்தனைக்கும் 10 காசு செலுத்த வேண்டும்.
"இந்தத் திட்டத்தில் பங்கேற்கும் பேரங்காடிகளில் பொருட்களை வாங்கும் 10ல் ஏழு வாடிக்கையாளர்கள், தங்களது சொந்த பைகளைக் கொண்டு வருகின்றனர் அல்லது பிளாஸ்டிக் பைகளைப் பெற மறுக்கின்றனர். பல்பொருள் அங்காடிகளைப் பொறுத்தவரை, 10ல் ஒன்பது பேர் அவ்வாறு செய்கின்றனர்," என்று ஃபேர்பிரைஸ் கூறியது.
பிளாஸ்டிக் பைகளுக்குக் கட்டணம் விதிக்கும் திட்டம் மூலம் கடந்த ஆண்டு பெறப்பட்ட $600,000, சுற்றுச்சூழல் மற்றும் சமூகப் பணிகளுக்கு நன்கொடை அளிக்கப்படும் எனத் தெரிவிக்கப்பட்டுள்ளது.
"கடந்த ஓராண்டு காலத்தில் குறிப்பிடத்தக்க அளவு பிளாஸ்டிக் பைகள் சேமிக்கப்பட்டு இருப்பது, சுற்றுச்சூழல் மீது பொதுமக்கள் கொண்டிருக்கும் விழிப்புணர்வைக் காட்டுகிறது," என்று ஃபேர்பிரைஸ் குழுமத்தின் தலைமை நிர்வாக அதிகாரி சியா கியான் பெங் கூறினார்.
ஃபேர்பிரைஸ், ஃபேர்பிரைஸ் ஃபைனஸ்ட், ஃபேர்பிரைஸ் எக்ஸ்ட்ரா ஆகிய 11 பேரங்காடிகளும் 12 சியர்ஸ் கடைகளும் ஒரு ஃபேர்பிரைஸ் எக்ஸ்பிரஸ் கடையும் பிளாஸ்டிக் பைகளுக்குக் கட்டணம் விதிக்கும் திட்டத்தில் இன்று முதல் பங்கேற்கின்றன.