மாணவர் முரசு
இ-பேப்பர்
ஸ்டாண்டர்ட் சார்ட்டர்ட் நிறுவனம் உலகளாவிய பயிற்சி மையத்தை சிங்கப்பூரில் அமைத்துள்ளது. இந்த மையத்துக்கு ‘டிஸ்கவர் லேப்’ எனப் பெயர் வைக்கப்பட்டுள்ளது.
இந்தப் பயிற்சி மையத்தின் மூலம் 2022ஆம் ஆண்டுக்குள் சிங்கப்பூரில் உள்ள தனது ஊழியர்களில் 8,000 பேருக்குப் பயிற்சி அளித்து அவர்களது திறன்களை மேம்படுத்த அது இலக்கு கொண்டுள்ளது.
தனது மின்னிலக்க, வர்த்தக வளர்ச்சித் திட்டங்களை ஆதரிக்கும் நோக்கில் சிங்கப்பூரில் உள்ள அதன் ஊழியரணியின் திறன்களை மேம்படுத்தி வலுவடையச் செய்ய ஸ்டாண்டர்ட் சார்ட்டர்ட் $5 மில்லியனை முதலீடு செய்துள்ளது.
புதிய ‘டிஸ்கவர் லேப்’ பயிற்சி மையம், ஸ்டாண்டர்ட் சார்ட்டர்ட்@ சாங்கி 1ல் அமைந்துள்ளது.
ஊழியர்களுக்குப் பயிற்சி அளிக்க மெய்நிகர் மற்றும் நேருக்கு நேர் சந்திப்பு அணுகுமுறை கடைப்பிடிக்கப்படும்.
ஊழியர்கள் தங்களுக்கு ஏற்கெனவே இருக்கும் திறன்களை மேம்படுத்தலாம். அல்லது தங்களுக்கு விருப்பமுள்ள புதிய திறனைக் கற்றுக்கொள்ளலாம். இந்தத் திறன் அவர்களது வேலையுடன் தொடர்பில்லாத ஒன்றாகக்கூட இருக்கலாம் என்று ஸ்டாண்டர்ட் சார்ட்டர்ட் வங்கி தெரிவித்தது.
செயற்கை நுண்ணறிவு, தரவுகள், சுய மேம்பாடு போன்ற திறன்களை ஊழியர்கள் கற்றுக்கொள்ளலாம்.
தனது ஒன்பது எதிர்காலத் திறன் பயிற்சிக் கழகங்களை ஒரே கூரையின்கீழ் ‘டிஸ்கவர் லேப்’ கொண்டு வருவதாக ஸ்டாண்டர்ட் சார்ட்டர்ட் வங்கி கூறியது.
மின்னிலக்க வங்கி முறை, அனைத்துலக வங்கி முறை, இணையத் தகவல் பாதுகாப்பு,
தரவுத் தீர்வுகள், பகுப்பாய்வு முறை, செயற்கை நுண்ணறிவு
உருவாக்கத் திறன் போன்ற எதிர்கால வளர்ச்சித் திறன்களில்
இந்தப் பயிற்சிக் கழகங்கள் கவனம் செலுத்தும் என்று தெரிவிக்கப்பட்டது.
எதிர்காலத்துக்கு தேவையான திறன்கள் கொண்ட ஊழியர்களை உறுதி செய்ய உயர் கல்வி நிலையங்கள், அரசாங்க ஊழியரணி அமைப்புகள், தொழிற்துறைப் பங்காளிகள் ஆகியோருடன் இணைந்து செயல்பட இருப்பதாக ஸ்டாண்டர்ட் சார்ட்டர்ட் வங்கி கூறியது.
சிங்கப்பூரில் அதன் அனைத்துலகப் பட்டதாரித் திட்டத்தைத் துரிதப்படுத்த திட்டம் கொண்டுள்ளதாகவும் அது தெரிவித்தது.
முன்னிலை பொறியியல் கல்லூரிகள், பயிற்சி நிலையங்கள் ஆகியவற்றிலிருந்து உள்ளூர் திறனாளர்களை வேலையில் அமர்த்தி சிங்கப்பூரில் உள்ள தனது தொழில்நுட்ப, புத்தாக்கக் குழுவில் சேர்க்க ஸ்டாண்டர்ட் சார்ட்டர்ட் திட்டமிட்டுள்ளது.
ஆள்சேர்ப்பு முயற்சிகளைப் பூர்த்தி செய்ய மைக்ரோசாஃப்ட், ஐபிஎம் ஆகிய நிறுவனங்களுடன் இணைந்து அது செயல்பட இருக்கிறது.
