மாணவர் முரசு
இ-பேப்பர்
அரசாங்க நிதி ஆதரவுடன் இயங்கும் ஏழு சிறப்புத் தேவைப் பள்ளிகள் 2022ஆம் ஆண்டிலிருந்து படிப்படியாக அவற்றின் புதிய வளாகங்களில் செயல்படும்.
மிதமானது முதல் கடுமையான கல்வித் தேவைகள் உடைய மாணவர்களுக்குச் சிறப்புத் தேவை பள்ளிகள் கிடைக்கச் செய்யும் தனது முயற்சிகளில் இதுவும் ஒன்று என்று கல்வி அமைச்சு நேற்று தெரிவித்தது.
கடந்த சில ஆண்டுகளாக இந்தப் புதிய பள்ளிகள் குறித்து கல்வி அமைச்சு அவ்வப்போது அறிவித்து வந்துள்ளது.
சமூக சேவை அமைப்புகளான 'அவ்வா' எனப்படும் ஆசிய மகளிர் நல்வாழ்வுச் சங்கம், சிங்கப்பூர் ஆட்டிசம் சங்கம், ரெயின்போ நிலையம், மெட்டா நல்வாழ்வுச் சங்கம் ஆகியவற்றுடன் இணைந்து பணியாற்றி நான்கு புதிய சிறப்புத் தேவைப் பள்ளிகளை அமைக்க ஆவன செய்யப்படும் என்று கல்வி அமைச்சு 2017 முதல் 2019 வரை வெளியிட்ட அறிக்கைகளில் கூறியிருந்தது.
அறிவாற்றல் குறைபாடு உடைய ஆட்டிசம் மாணவர்களுக்கான பள்ளிகளின் தேவை அதிகரித்து வருவதன் காரணமாக இந்த நடவடிக்கை அறிவிக்கப்பட்டது.
ஈடன் பள்ளி 2, அவ்வா பள்ளி 2, ரெயின்போ நிலையப் பள்ளி 2, மெட்டா பள்ளி 2 ஆகியவையே அந்த நான்கு சிறப்புத் தேவைப் பள்ளிகள்.
பள்ளிப் பதிவின்போது, அந்தப் பள்ளி அதன் நிரந்தர வளாகத்துக்கு மாறுவதற்கு முன், இந்த நான்கு பள்ளிகளுக்குமான அதிகாரத்துவ பெயர்கள் வெளியிடப்படும் என்று கூறிய அமைச்சு, இப்போதைக்கு பள்ளியை நடத்தும் சம்பந்தப்பட்ட சமூக அமைப்பின் பெயரே பள்ளிக்குத் தற்காலிகமாக வைக்கப்பட்டுள்ளது என்று விவரித்தது.
ஒவ்வொரு பள்ளியிலும் ஓராண்டுக்கு 25 இடங்கள் ஒதுக்கப்படும். முடிவில் ஒவ்வொரு பள்ளியிலும் மொத்தம் 300 மாணவர்கள் பயில்வார்கள். தற்போதைய நிலையைக் காட்டிலும் அந்த நான்கு பள்ளிகளிலும் கூடுதலாக 1,200 இடங்கள் இருக்கும்.
2022ஆம் ஆண்டிலிருந்து ஈடன் பள்ளி 2, புக்கிட் பாத்தோக் வெஸ்ட் அவென்யூ 2ல் உள்ள முன்னாள் ஹோங் கா தொடக்கப் பள்ளி வளாகத்திலும், அவ்வா பள்ளி 2, பிடோக் ரெசர்வோர் கிரசென்ட்டில் உள்ள பிடோக் வெஸ்ட் தொடக்கப் பள்ளி வளாகத்திலும், ரெயின்போ நிலையப் பள்ளி 3, அல்மிரல்டி லிங்க், அட்மிரல்டி லேன் சந்திப்பில் உள்ள வளாகத்திலும் செயல்படும்.
2024ஆம் ஆண்டு முதல் மெட்டா பள்ளி 2, பாசிர் ரிஸ் ஸ்திரீட் 51ல் உள்ள முன்னாள் கோரல் தொடக்கப் பள்ளி வளாகத்தில் செயல்படும்.
மொத்தத்தில், 2021ம் ஆண்டு முதல் ஆட்டிசம் அறிவாற்றல் குறைபாடு உள்ள மாணவர்களுக்காக ஆறு சிறப்புத் தேவைப் பள்ளிகள் இருக்கும். ஈடன் பள்ளி, செயின்ட் ஆண்ட்ரூஸ் ஆட்டிசம் பள்ளி ஆகியவை மற்ற இரண்டு பள்ளிகள்.
மிதமான ஆட்டிசம் அறிவாற்றல் குறைபாடு உடைய மாணவர்களுக்காக மேலும் மூன்று பள்ளிகள் அமைக்கப்படும். அவற்றில் இரண்டை சிங்கப்பூர் ஆட்டிசம் வளநிலையம், 2024ல் பாத்லைட் பள்ளி 2 என்ற பெயரிலும், 2027ல் பாத்லைட் பள்ளி 3 என்ற பெயரிலும் நடத்தும்.
மூன்றாவது பள்ளியை செயின்ட் ஆண்ட்ரூஸ் மிஷன் மருத்துவமனை 2022ஆம் ஆண்டு நடத்தும் என்றும் கூறப்பட்டது.