மாணவர் முரசு
இ-பேப்பர்
சிங்கப்பூரின் உற்பத்தித் துறை நவம்பரில் மீண்டெழுந்தது. முந்தைய மாதத்தில் அந்தத் துறை சந்தித்த சரிவு, நவம்பரில் வளர்ச்சியாக மாறி இருக்கிறது.
ஆண்டுக்காண்டு அடிப்படையில் பார்க்கையில் நவம்பர் மாத உற்பத்தி 17.9 விழுக்காடு கூடி இருக்கிறது. இந்தத் துறை அக்டோபரில் 0.8 விழுக்காடு குறைந்திருந்தது குறிப்பிடத்தக்கது. பொருளியல் வளர்ச்சிக் கழகம் நேற்று வெளியிட்ட புள்ளிவிவரங்கள் மூலம் இவை தெரியவருகின்றன.
உயிரியல் மருத்துவ உற்பத்தித் துறையை நீக்கிவிட்டுப் பார்க்கையில், உற்பத்தித் துறை சென்ற மாதம் 14 விழுக்காடு கூடி இருக்கிறது. மாத அடிப்படையிலான சரியாக்கங்களை அடுத்து நவம்பரில் வளர்ச்சி 7.2 விழுக்காடாக இருக்கிறது.
உயிரியல் மருத்துவ உற்பத்தித் துறையை நீக்கிவிட்டுப் பார்க்கையில் வளர்ச்சி, அக்டோபருடன் ஒப்பிடுகையில், சென்ற மாதம் 6 விழுக்காடாக இருந்தது.
உயிரியல் மருத்துவ உற்பத்தி சென்ற ஆண்டு நவம்பருடன் ஒப்பிடுகையில் இந்த ஆண்டு 40.6 விழுக்காடு விரிவடைந்து இருக்கிறது. மருந்து தயாரிப்புத் துறை 50.8 விழுக்காடு வளர்ந்தது.
மருத்துவ தொழில்நுட்பத் துறையும் 22.7 விழுக்காடு விரிவடைந்தது. முக்கியமான மின்னணுத் துறை ஆண்டுக்காண்டு அடிப்படையில் நவம்பரில் 34.9 விழுக்காடு விரிவடைந்தது.
இந்தத் துறையின் எல்லா பிரிவுகளிலுமே வளர்ச்சி இருந்தது. என்றாலும் தகவல்தொடர்பு மற்றும் பயனீட்டாளர் மின்னியல் துறை இதற்கு விதிவிலக்கு.
குறிப்பாக கணினிச் சில்லு தொழில்துறை 40.9 விழுக்காடு வளர்ச்சி கண்டுள்ளது. மின்னணுக் குழுமத்தின் உற்பத்தி ஜனவரி முதல் நவம்பர் வரை ஆண்டுக்காண்டு அடிப்படையில் 9.3 விழுக்காடு வளர்ச்சி கண்டு இருக்கிறது.
துல்லிய பொறியியல் குழுமம், சென்ற ஆண்டு நவம்பருடன் ஒப்பிடுகையில் சென்ற மாதம் 7.3 விழுக்காடு கூடியது. ரசாயனத் துறைக் குழுமம் சென்ற மாதம் 10.1 விழுக்காடு விரிவு கண்டது.
மொத்தத்தில், இந்தக் குழுமம் 2019ஆம் ஆண்டுடன் ஒப்பிடுகையில் இந்த ஆண்டில் இதுவரை 2.2 விழுக்காடு குறைந்துள்ளது.
மாறாக, பொது உற்பத்தி ஆண்டுக்காண்டு அடிப்படையில் 13.3 விழுக்காடு குறைந்தது.
இந்தப் பிரிவு ஆண்டுக்காண்டு அடிப்படையில் இந்த ஆண்டின் ஜனவரி முதல் நவம்பர் வரை 12.7 விழுக்காடு குறைந்துள்ளது.
போக்குவரத்துப் பொறியியல் துறையும் நவம்பரில் 29.5 விழுக்காடு சுருங்கியதாகவும் புள்ளி விவரங்கள் தெரிவித்துள்ளன.
உயிரியல் மருத்துவ உற்பத்தி 40.6% கூடியது; மருந்து தயாரிப்புத் துறை 50.8% வளர்ச்சி