மாணவர் முரசு
இ-பேப்பர்
வேலை நியமனத்தின்போது பாரபட்சத்துடன் நடந்துகொண்டு இருக்கலாம் எனக் கூறி, கடந்த மூன்றாண்டுகளில் சராசரியாக ஆண்டிற்கு 400 சம்பவங்களை நியாயமான வேலை நடைமுறைகளுக்கான முத்தரப்புக் கூட்டணி விசாரித்தது என்று மனிதவள அமைச்சு நாடாளுமன்றத்தில் தெரிவித்தது.
ஒவ்வோர் ஆண்டும் கிட்டத்தட்ட 50 சம்பவங்களில் நியாயமான வேலை நடைமுறைக்கான முத்தரப்பு வழிகாட்டுதல்களை நிறுவனங்கள் மீறியது கண்டுபிடிக்கப்பட்டது என்றும் அவற்றின் வேலை அனுமதிச்சீட்டு சிறப்புரிமைகள் தற்காலிகமாக நிறுத்தி வைக்கப்பட்டன என்றும் மனிதவள துணை அமைச்சர் கான் சியாவ் ஹுவாங் கூறினார்.
அவற்றில் கிட்டத்தட்ட 60% சம்பவங்களில், எந்த நாட்டவர் என்ற அடிப்படையில் பாகுபாடு காட்டப்பட்டதாகத் தெரிவிக்கப்பட்டது.
மூன்றில் ஒரு பங்கு சம்பவங்களில் பாலினம், வயது அடிப்படையில் பாகுபாடு காட்டப்பட்டது. எஞ்சிய சம்பவங்களில் இனம், திருமண நிலை அல்லது குடும்பப் பொறுப்புகள் போன்றவை தொடர்பில் பாரபட்சம் காட்டப்பட்டதாகத் தெரிவிக்கப்பட்டது.
“மனிதவள நடைமுறைகளைப் பின்பற்றுவதில் குறைபாட்டுடன் நடந்துகொண்டு, அதன் காரணமாக ஆட்சேர்ப்பு நடைமுறையில் தவறான தகவலும் பாகுபாடும் இடம்பெற்றது போன்ற கடுமை குறைவான சம்பவங்களில் நிறுவனங்களுக்கு அமைச்சு எச்சரிக்கை விடுத்தது. இத்தகைய சம்பவங்களில், குறைபாடுகளைக் களையும்படி முத்தரப்புக் கூட்டணி நிறுவனங்களுக்கு ஆலோசனை வழங்கும்,” என்று திருவாட்டி கான் கூறினார்.
சராசரியாக ஓராண்டிற்கு 40 எச்சரிக்கைகளை அமைச்சு விடுத்திருப்பதாக அவர் குறிப்பிட்டார்.
