மாணவர் முரசு
இ-பேப்பர்
வீடமைப்புத் திட்டங்களுக்கு வழிவிடுவதற்காக பாலஸ்டியர், தோ பாயோ, பிடோக், ஜூரோங் ஈஸ்ட் ஆகியவற்றில் அமைந்துள்ள நான்கு தளங்கள் அடையாளம் காணப்பட்டுள்ளன.
வீடமைப்பு வளர்ச்சிக் கழகத்தின் ஒப்பந்த ஆவணங்களின்படி 51 ஜாலான் ராஜா, 1 லோரோங் 6 தோ பாயோ, 58 பிடோக் நார்த் ஸ்திரீட் 3, 571 ஜூரோங் ஈஸ்ட் ஸ்திரீட் 24 ஆகிய இடங்களில் அத்தளங்கள் அமைந்துள்ளன.
அடுத்த 10 முதல் 15 ஆண்டுகளின் மேம்பாட்டுப் பணிகளையுடைய நகர சீரமைப்பு ஆணையத்தின் பெருந்திட்டத்தின்கீழ் இத்தளங்கள், குடியிருப்புக்குரியவை. அதாவது, வீவக வீடுகள் அல்லது தனியார் வீடுகள் அங்குள்ள நிலத்தில் கட்டப்படலாம்.
இதன்படி, அடையாளம் காணப்பட்ட நான்கு நிலப் பகுதிகளும் பொது அல்லது தனியார் வீடமைப்புத் திட்டங்களுக்குப் பயன்படுத்தப்படுவது தொடர்பில் வீடமைப்பு வளர்ச்சிக் கழகம் விவரிக்கவில்லை.
இருப்பினும், மேல்விவரங்கள் படிப்படியாகத் தெரிவிக்கப்படும். தனியார் வீடமைப்புக்கு பயன்படுத்துவதாக இருந்தால், ஈராண்டுக்கு ஒரு முறை நடைபெறும் அரசாங்க நில விற்பனை திட்டத்தின்கீழ், மேம்பாட்டாளர்களுக்கு நிலப் பகுதிகள் விற்கப்படும்.
இதற்கு முன் தோ பாயோ விளையாட்டு அரங்கத்திற்கு எதிரே, காலாங் ஆறு, தீவு விரைவுச்சாலை அருகே 51 ஜாலான் ராஜாவில் குளோபல் இந்தியன் இண்டர்நேஷனல் பள்ளியின் பாலஸ்டியர் வளாகம் அமைந்திருந்தது.
யூஹுவா தொடக்கப்பள்ளியுடன் 2002ஆம் ஆண்டில் இணைக்கப்பட்ட யூச்சின் தொடக்கப்பள்ளிக் கட்டடம் முன்பு, ஜூரோங் ஈஸ்ட் தளத்தில் செயல்பட்டது.
பிடோக் நிலப் பகுதியில் தற்போது சிறுவர்களுக்கான முஹம்மதியா சமூகநல இல்லம் செயல்பட்டு வருகிறது.
ஆனால் அது பாசிர் ரிசில் உள்ள ஒரு புதிய இடத்திற்கு ஜூன் மாதம் மாறவுள்ளது. டௌன்டவுன் பாதையில் பிடோக் ரெசெர்வோர் எம்ஆர்டி நிலையத்தின் அருகில் பிடோக் நிலப் பகுதி அமைந்துள்ளது.
கட்டடங்களை இடிக்கும் பணி அடுத்த ஆண்டு ஜூலை மாதத்திற்கும் மே மாதத்திற்கும் இடையே தொடங்கும் என்று எதிர்பார்க்கப்படுகிறது.
பெய் சுன் பொதுப் பள்ளி, மதராசா அல்-அரேபியா அல்-இஸ்லாமியா ஆகியவற்றுக்கு அருகில் சுமார் 5,500 சதுர மீட்டர் பரப்பளவில் தோ பாயோ நிலம் உள்ளது. இங்கு நவம்பர் மாதத்திற்குள் கட்டடங்களை இடிக்கும் பணி முடிவடையும் என்று கூறப்படுகிறது.
ஒப்பந்த ஆவணங்களில் பாலஸ்டியர், ஜூரோங் ஈஸ்ட் தளங்களுக்கான கட்டட இடிப்பு தேதிகள் குறிப்பிடப்படவில்லை.