மாணவர் முரசு
இ-பேப்பர்
வளங்களை திறனோடு, கச்சிதமாகப் பயன்படுத்தும் முயற்சியாக உற்பத்தி நிறுவனமான 'மைக்ரோவேவ் பேக்கேஜிங்' அதன் அட்டைப் பெட்டிகளின் வடிவமைப்பைப் புதுப்பித்துள்ளது, தற்போது ஓர் அட்டையைப் பயன்படுத்தி ஒரே நேரத்தில் ஆறு பெட்டிகளை அச்சிடுகிறது. முன்னர் இது நான்கு பெட்டிகளாக இருந்தது. இதன் விளைவாக இந்நிறுவனத்தில் ஆண்டுதோறும் சுமார் 70 டன் பொட்டலமிடுதல் பொருட்கள் குறைக்கப்படுகின்றன.
பொட்டலமிடுதலில் விரயத்தைக் குறைத்த இந்நிறுவனம், சிங்கப்பூர் பொட்டலமிடுதல் ஒப்பந்த விருதுகளில், சிறிய-நடுத்தர நிறுவனங்கள் பிரிவின் கீழ் சிறந்த சாதனை விருதைப் பெற்றது.
பொட்டலமிடப் பயன்படுத்தப்படும் பொருட்களின் அளவைக் குறைத்ததன் மூலம் விரயத்தை குறைத்த 15 நிறுவனங்கள் நேற்று சிங்கப்பூர் பொட்டலமிடுதல் ஒப்பந்த விருது பெற்றன.
வர்த்தகங்கள், பொட்டலமிடுதலில் விரயத்தை நிலையான முறையில் நிர்வகிக்கும் ஒரு திட்டமும் சிங்கப்பூர் உற்பத்தி சம்மேளனத்தின் கட்டடத்தில் நேற்று நடைபெற்ற விழாவில் அறிவிக்கப்பட்டது.
கடந்த ஆண்டு மார்ச் 1 முதல் பிப்ரவரி 29ஆம் தேதி வரை பொட்டலமிடுதலில் விரயத்தைக் குறைப்பதில் குறிப்பிடத்தக்க முயற்சிகளை மேற்கொண்ட, சிங்கப்பூர் பொட்டலமிடுதல் ஒப்பந்தத்தில் கையெழுத்திட்டுள்ள வர்த்தகங்களை இந்த விருதுகள் அங்கீகரித்தன.
மொத்தம் 10 பன்னாட்டு நிறுவனங்கள் அல்லது பெரிய உள்ளூர் நிறுவனங்கள், ஐந்து சிறிய, நடுத்தர நிறுவனங்கள் பொட்டலமிடுதலில் விரயத்தைக் குறைத்தல், மறுபயனீடு அல்லது மறுசுழற்சி செய்தல், மறுசுழற்சி செய்யப்பட்ட பொருட்களின் பயன்பாடு ஆகியவற்றிற்கான முயற்சிகளுக்காக அங்கீகரிக்கப்பட்டன.
சிங்கப்பூர் பொட்டலமிடுதல் ஒப்பந்தத்தில் கையெழுத்திட்டுள்ள 100க்கும் மேற்பட்ட தொழில்கள் விரயத்தைக் குறைப்பதற்கான முயற்சிகளுக்கு அங்கீகாரம் பெற்றன.