ஐரோப்பிய பன்னாட்டு நிறுவனமான 'ஸ்னைடர் எலக்ட்ரிக்'கும் பொருளியல் மேம்பாட்டுக் கழகமும் இணைந்து சிங்கப்பூரைத் தலைமையகமாகக் கொண்ட 'நேவிஎக்ஸ் சொல்யூஷன்ஸ்' எனும் நிறுவனத்தைத் தொடங்கி இருக்கின்றன.
அந்நிறுவனத்தின்மூலம் நூறு புதிய வேலைகள் உருவாக்கப்படலாம். வாடிக்கையாளர் சேவை, தொழில்நுட்ப ஆதரவு, நிதி, மனிதவளம், தளவாடம் ஆகிய பிரிவுகளில் அவ்வேலைகள் உருவாக்கப்படும் என்று நேவிஎக்ஸ் சொல்யூஷன்ஸ் நிறுவனத்தின் தலைமை நிர்வாகி சைமன் கிளேரிங்போல்ட் தெரிவித்தார்.
மின்னாக்கிகள், இடைநிலை மின்னழுத்த 'சுவிட்ச் கியர்'கள் போன்ற சொத்துகளை நிர்வகிப்பதிலும் பயன்படுத்துவதிலும் நிறுவனங்களுக்கு நேவிஎக்ஸ் சொல்யூஷன்ஸ் உதவும்.
காலாங்கில் ஸ்னைடர் எலக்ட்ரிக் நிறுவனத்தின் தலைமையகத்திற்குத் துணைப் பிரதமர் ஹெங் சுவீ கியட் நேற்று வருகை மேற்கொண்டார். அப்போது அந்நிறுவனத்தின் புத்தாக்க முயற்சிகளில் சில அவருக்குக் காட்டப்பட்டன.
மின்னிலக்கப் பொருளியலில் இப்போது மின்னாற்றல், குளிர்விப்புச் சொத்துகள் ஆகியவை வர்த்தகக் கட்டமைப்பில் முக்கிய இடம்பெறுவதால் அத்துறையின் முக்கிய சவால்களுக்குத் நேவிஎக்ஸ் சொல்யூஷன்ஸ் நிறுவனம் தீர்வுகாணும் என்று திரு கிளேரிங்போல்ட் தெரிவித்தார்.
"சந்தை மாற்ற வேகத்திற்கு ஈடுகொடுக்கும் விதத்தில் நிறுவனங்களுக்கு ஆதரவளிப்பதும் நீடித்து நிலைக்கும் வகையில் மாறுவதற்கான தேவையைச் சமன்செய்வதும் எங்களது பொறுப்பும் உந்துசக்தியும் ஆகும்," என்றும் அவர் சொன்னார்.