மாணவர் முரசு
இ-பேப்பர்
சுகாதார அமைச்சின் தரவு நிர்வாகப் பிரிவின் துணைத் தலைவராக முன்பு இருந்த ஸாவோ ஸெங் எனும் 36 வயது மாது, சிங்கப்பூரில் தினசரி கொவிட்-19ஆல் பாதிக்கப்பட்டவர்களின் விவரங்களை 22 முறை கசியவிட்டதாக நேற்று நீதிமன்றத்தில் குற்றம் சாட்டப்பட்டது.
ரகசியத் தகவல்களைக் கசியவிட்டதாக கடந்த ஆண்டு ஏப்ரல் மாதத்தில் கைது செய்யப்பட்ட அவர் மீது அலுவலக ரகசியங்கள் சட்டத்தின்கீழ் 24 குற்றச்சாட்டுகள் சுமத்தப்பட்டன.
கொவிட்-19 நோயாளி ஒருவரின் நிலை குறித்து ஸாவோவிடம் விவரம் கேட்டு தவறான தொடர்பு கொண்டமைக்காக ஸாவோவின் தோழியான 36 வயது டாங் லின் மீதும் நேற்று குற்றம் சுமத்தப்பட்டது. அலுவலக ரகசியங்கள் சட்டத்தின்கீழ் டாங் 10 குற்றச்சாட்டுகளை எதிர்நோக்குகிறார்.
தினசரி கொவிட்-19 பாதிப்பு விவரம் குறித்து சுகாதார அமைச்சு அறிவிக்கும் முன்பாகவே அந்தத் தகவல் கசிந்திருப்பதாக கடந்த ஆண்டு ஏப்ரல் மாதம் 16ஆம் தேதி பொதுமக்களிடமிருந்து போலிசுக்கு புகார் கிடைத்ததாக நேற்று முன்தினம் வெளியான அறிக்கை குறிப்பிட்டது.
அத்தகைய ரகசிய தகவல்களைப் பெற அனுமதியற்ற உரையாடல் குழுவில் கடந்த ஆண்டு மார்ச், ஏப்ரல் மாதங்களில் அந்தத் தகவல்களை ஸாவோ 22 முறை பகிர்ந்ததாக விசாரணையில் தெரியவந்தது. அந்தத் தகவல்களைப் பெற்ற அல்லது மற்றவர்களுக்கு அனுப்பிய 64 பேருக்கு அலுவலக ரகசியங்கள் சட்டத்தின்கீழ் கடும் எச்சரிக்கை அல்லது எழுத்துபூர்வ ஆலோசனைகள் வழங்கப்படும் என்று தெரிவிக்கப்பட்டது.
இந்தச் சட்டத்தின்கீழ் தவறான தொடர்புகொள்ளும் குற்றம் புரிவோருக்கு $2,000 வரை அபராதம், ஈராண்டுகள் வரை சிறைத் தண்டனை விதிக்கப்படலாம்.
அந்தத் தகவல்களைப் பெறும் அனுமதியில்லாதவர்கள் அத்தகைய ரகசியத் தகவல்களைப் பெற்றிருந்தால் அவற்றை மற்றவர்களுக்கு அனுப்பாமல் உடனே அழித்துவிட வேண்டும். இல்லாவிட்டால் அவர்களும் அலுவலக ரகசியங்கள் சட்டத்தின்கீழ் குற்றம்சாட்டப்படுவர்.