மாணவர் முரசு
இ-பேப்பர்
இவ்வாண்டின் மூன்றாவது காலாண்டில் வர்த்தகம் மேம்படும் என்று உள்ளூர் நிறுவனங்களுக்கு இருக்கும் நம்பிக்கை மேம்பட்டுள்ளது. நிதி, உற்பத்தி, மொத்த வியாபாரம் ஆகிய துறைகளில் வர்த்தக வாய்ப்பு முன்னேற்றம் கண்டிருப்பதை அடுத்து கூடுதல் வருமானத்தை இத்துறையைச் சார்ந்த வர்த்தகர்கள் எதிர்பார்க்கின்றனர்.
இருப்பினும், கட்டுமானம் மற்றும் போக்குவரத்து துறைகள் தொடர்ந்து பின்னடைவைச் சந்திக்கின்றனன. வரும் ஜூலை-ஆகஸ்ட் மாதங்களுக்கான ஒட்டு மொத்த வர்த்தக நம்பிக்கைநிலை குறியீடு +4.07 புள்ளிகள் அதிகரித்துள்ளதாக சிங்கப்பூர் வர்த்தகக் கடன் பிரிவு தெரிவித்துள்ளது.
தொடர்ச்சியாக நான்கு காலாண்டுகளாகச் சரிவைக் கண்ட குறியீடு இவ்வாண்டின் இரண்டாம் காலாண்டில் +3.94 புள்ளிகள் அதிகரித்தது.
கொவிட்-19 கிருமித்தொற்று சிங்கப்பூரில் மீண்டும் தலைதூக்காமல் இருக்க அண்மையில் விதிக்கப்பட்ட கட்டுப்பாடுகள் காரணமாக கட்டுமானம், போக்குவரத்து முதலிய துறைகள் பாதிப்படைந்திருப்பதாக பிரிவின் தலைமை நிர்வாக அதிகாரி திருவாட்டி ஓட்ரே சியா கூறினார்.
"கொவிட்-19 நெருக்கடிநிலை காரணமாக சிங்கப்பூரிலும் உலகளவிலும் நிலையற்றநிலை தொடர்கிறது. எனவே வர்த்தகநிலை துறைக்குத் துறை மாறுபடும் என்று முன்னுரைக்கப்படுகிறது," என்றார் திருவாட்டி சியா.
மூன்றாவது காலாண்டை நெருங்கும் நிலையில் கூடுதல் பின்னடைவுகளுக்கு நிறுவனங்கள் தயாராக இருக்க வேண்டும் என்று அவர் எச்சரிக்கை விடுத்தார்.
ஆறு முக்கிய கூறுகளை அடிப்படையாகக் கொண்டு ஒட்டுமொத்த வர்த்தக நம்பிக்கைநிலை குறியீடு நிர்ணயிக்கப்படுகிறது.
விற்பனை அளவு, நிகர லாபம், விற்பனை விலை, புதிய விற்பனைப் பரிவர்த்தனைகள், சரக்கின் அளவு, ஊழியர் எண்ணிக்கை ஆகிய ஆறு முக்கிய கூறுகளை அடிப்படையாகக் கொண்டு குறியீடு நிர்ணயிக்கப்படும். இவ்வாண்டில் முதல் காலாண்டில் இந்த ஆறு கூறுகளும் மேம்பட்டன.
இரண்டாம் காலாண்டில் மூன்று கூறுகள் மேலும் அதிகமாக மேம்பட்டுள்ளதாக பிரிவு கூறியது. விற்பனை அளவு, நிகர லாபம் ஆகியவற்றுக்கான குறியீடு இவ்வாண்டின் முதல் காலாண்டில் +9.92 புள்ளிகளாகப் பதிவாகின.
இரண்டாம் காலாண்டில் இது +7.63 புள்ளிகளாகப் பதிவாகியுள்ளது. விற்பனை விலைக்கான குறியீடு +1.53 புள்ளிகளிலிருந்து +2.29ஆக உயர்ந்துள்ளது.
புதிய விற்பனைப் பரிவர்த்தனைகளுக்கான குறியீடு மாற்றம் ஏதுமில்லாது 9.92ஆக உள்ளது. சரக்கின் அளவுக்கான குறியீடு -7.64லிருந்து -6.11ஆக ஏற்றம் கண்டுள்ளது.
வேலை நியமன எண்ணிக்கைக்கான குறியீடு பூஜ்ஜியத்திலிருந்து +3.05ஆக உயர்ந்துள்ளது.