கொவிட்-19 கிருமித்தொற்றை சுயமாக பரிசோதித்துக்கொள்வதற்கான கருவி நேற்று முதல் சிங்கப்பூரின் பெரிய மருந்துக்கடைகளில் விற்பனைக்கு வந்துள்ளது.
தீவு முழுவதும் உள்ள 79 கார்டி யன் கடைகளில் இரு வெவ்வேறு ஏஆர்டி விரைவு பரிசோதனைக் கருவிகள் இருப்பு வைக்கப்பட்டு உள்ளன.
அபாட், குவிக்வியூ ஆகிய நிறுவனங்களின் தயாரிப்புகள் இவை. இவ்விரண்டு நிறுவனங்
களின் பரிசோதனைக் கருவிகளும் சுகாதார அறிவியல் ஆணையத்தால் அங்கீகரிக்கப்பட்டுள்ளதாக கார்டியன் கடைத்தொகுதிகளின் பேச்சாளர் ஸ்ட்ரெய்ட்ஸ் டைம்ஸ் செய்தித்தாளிடம் தெரிவித்தார்.
"இரண்டு கருவிகளைப் பயன்
படுத்தும் முறையும் வெவ்வேறானவை என்பதால் வாடிக்கையாளர்கள் கருவியுடன் தரப்படும் வழிகாட்டுப் பிரசுரத்தைப் படித்து அதன்படி பயன்படுத்த வேண்டும்," என்றார் அவர்.
இவ்விரண்டு பரிசோதனைக் கருவிகளும் வாட்சன் கடைகளிலும் யுனிட்டி கடைகளிலும்கூட விற்பனைக்கு வைக்கப்பட்டு உள்ளன. இவற்றின் விலை, சுகாதார அமைச்சின் பரிந்துரைக்கு இணங்க $10 முதல் $13 வரை நிர்ணயிக்கப்பட்டு விற்கப்படுகிறது.
கார்டியன் கடைகளில் அபாட் நிறுவன பரிசோதனைக் கருவி $13க்கு விற்கப்படுகிறது. அதே கருவி யுனிட்டி கடைகளில் $12.80க்கும் வாட்சன் கடைகளில் $13.10க்கும் விற்கப்படுகிறது. பத்து அல்லது அதற்கு மேற்பட்ட கருவிகளை வாங்கும்போது இதைவிட மலிவான விலைக்கு அவை கிடைக்கும். பரிசோதனைக் கருவிகளின் விற்பனை நேற்றுக் காலை தொடங்கியதும் ஜூரோங் ஈஸ்ட், புக்கிட் பாஞ்சாங், பொத்தோங் பாசிர், தோ பாயோ ஆகிய வட்டாரங்களில் உள்ள கார்டியன், வாட்சன், யுனிட்டி ஆகிய கடைகளுக்கு ஸ்ட்ரெய்ட்ஸ் டைம்ஸ் செய்தியாளர்கள் சென்றபோது சிலர் அக்கருவிகளை வாங்கிச் செல்வதை அவர்களால் காணமுடிந்தது.
திருவாட்டி ஜே.பிரவுன், 60, என் பவர் புக்கிட் பாஞ்சாங் பிளாசாவில் உள்ள வாட்சன் மருந்துக் கடையில் கொவிட்-19 பரிசோதனைக் கருவியை வாங்கினார். வரும் செப்டம்பர் மாதம் பிரிட்டனுக்குத் திரும்பிச் செல்லும் தமது குடும்பத்தினருக்காக இக்கருவியை வாங்கியதாக அவர் குறிப்பிட்டார்.
"நமக்கென்று ஒரு கருவி இருக்கும்போது பரிசோதனை நிலையத்தை நாடிச் செல்லவேண்டிய அவசியம் நேராது," என்று கூறிய அந்த மாதின் கணவர் எண்ணெய் மற்றும் எரிவாயு நிறுவனம் ஒன்றிலும், மகள் பள்ளிக்கூடம் ஒன்றிலும் வேலை செய்கின்றனர்.
"சிங்கப்பூரைவிட்டுப் புறப்படு
வதற்கு ஒன்று அல்லது இரண்டு வாரங்களுக்கு முன்னதாக நம்மை நாமே பரிசோதனைக் கருவி கொண்டு சோதித்துப் பார்த்து முடிவைத் தெரிந்துகொள்வதன் மூலம் விமான நிலையத்தில் ஏற்படும் அசௌகரியத்தைத் தவிர்க்கலாம். குறைந்தபட்சம் 90 விழுக்காடு முடிவை நாம் இதன் மூலம் தெரிந்து கொள்ள முடியும்," என்றார் அவர்.
கொவிட்-19ஐ அறியும் கருவியின் விலை $10 முதல் $13 வரை