சிங்கப்பூரின் எண்ணெய் சாராத உள்நாட்டு ஏற்றுமதிகள் ஏப்ரல் மாதத்தைவிட கடந்த மே மாதம் வேகமாகக் கூடின.
மின்னணுப் பொருட்களும் இயந்திரங்கள், ரசாயனம் போன்ற மின்னணு சாரா பொருட்களும் அதிகமாக ஏற்றுமதியானதே முக்கிய காரணமாக இருந்தது. இந்த ஏற்றுமதிகள் மே மாதம் 8.8% அதிகரித்தன. ஏப்ரலில் இந்த அதிகரிப்பு 6% ஆக இருந்தது.
எண்ணெய் சாராத ஊள்நாட்டு ஏற்றுமதிகள் சென்ற ஆண்டு டிசம்பர் முதல் வளர்ச்சி கண்டு வருவதாக எண்டர்பிரைஸ் சிங்கப்பூர் அமைப்பு வெளியிட்ட புள்ளிவிவரங்கள் மூலம் தெரிகிறது.
இந்த ஏற்றுமதிகள் மே மாதம் 16% கூடும் என்று புளூம்பர்க் நிறுவனம் நடத்திய ஆய்வில் பகுப்பாய்வாளர்கள் கணித்து இருந்தார்கள். ஆனால் இந்த அளவுக்கு அதிகரிப்பு இடம்பெறவில்லை.
மாதாந்திர சரியாக்க அடைப்படையில் பார்க்கையில், மே மாதம் எண்ணெய் சாராத ஊள்நாட்டு ஏற்றுமதிகள் 0.1% குறைந்தன. இந்தக் குறைவு ஏப்ரலில் 8.8% ஆக இருந்தது.
மின்னணு தயாரிப்புப் பொருட்கள் ஏற்றுமதி ஆண்டுக்கு ஆண்டு அடிப்படையில் சென்ற மாதம் 11% கூடியது. ஏப்ரலில் இந்த அதிகரிப்பு 10.9% அக இருந்தது.
மின்னணு சாராத பொருட்கள் ஏற்றுமதி சென்ற ஆண்டு மே மாதத்துடன் ஒப்பிடுகையில், இந்த ஆண்டு மே மாதம் 8.1% கூடியது. இந்த அதிகரிப்பு கடந்த ஏப்ரலில் 4.7% ஆக இருந்தது.
மொத்தமாக சிங்கப்பூரின் முக்கியமான சந்தைகளுக்கான ஏற்றுமதிகள் சென்ற மாதம் கூடின. இருந்தாலும் அமெரிக்கா, ஜப்பான், ஐரோப்பிய ஒன்றியத்திற்கான ஏற்றுமதிகள் குறைந்ததாக புள்ளி விவரங்கள் தெரிவிக்கின்றன.