புக்கிட் மேரா வியூ சந்தை மற்றும் உணவு நிலையத்தில் கொவிட்-19 கிருமிப் பரவல் ஏற்பட்டதற்குப் பல அம்சங்கள் காரணமாக இருக்கலாம். இருப்பினும் குறிப்பிட்டு எது காரணம் என்பதை இன்னும் உறுதிசெய்யவில்லை என்று கொள்ளைநோய் தொடர்பில் இயங்கிவரும் அமைச்சுகள்நிலை பணிக்குழு நேற்று தெரிவித்தது.
நிலையத்தில் கழிவறை போன்று பொதுவாகப் பயன்படுத்தப்படும் வசதிகள் தொற்றுப் பரவலுக்குக் காரணமாக இருக்கலாம் என்று கூறப்பட்டது.
பிரபலமான கடைகளில் அரை மணி நேரம் அல்லது அதற்கும் மேல் நீண்ட வரிசையில் மக்கள் காத்திருப்பதும் காரணமாக இருக்கலாம் என்றார் மருத்துவச் சேவைத் துறை இயக்குநரான இணைப் பேராசிரியர் கென்னத் மாக்.
புக்கிட் மேரா வியூ கிருமித்தொற்றுக் குழுமத்தில் நேற்றைய நிலவரப்படி 56 சம்பவங்கள் பதிவாகிவிட்டதை அவர் குறிப்பிட்டார். பாதிக்கப்பட்டவர்களில் 21 பேர் கடைக்காரர்கள், சந்தைக்கோ உணவு நிலையத்திற்கோ வருகையளித்தவர்கள் 13 பேர் ஆவர். எஞ்சியவர்களுக்கு உணவு நிலையம் சென்றவர்களிடமிருந்து தொற்று பரவியுள்ளது என்றார் பேராசிரியர் மாக்.
இதற்கிடையே, புக்கிட் மேரா வியூ சந்தைக்கு அருகில் ஏற்பட்டுள்ள இதர கொவிட்-19 குழுமங்களை சுகாதார அமைச்சு ஆராய்ந்து வருவதாக அவர் குறிப்பிட்டார். அவற்றுக்கும் புக்கிட் மேரா வியூ கிருமித்தொற்றுக் குழுமத்திற்கும் தொடர்பு உள்ளதா என்பதைக் கண்டறியும் பணி நடந்து வருகிறது.
கிருமிப் பரவலுக்கான காரணத்தைக் கண்டறிந்ததும் சுகாதார அமைச்சு அதன் கண்டுபிடிப்புகளை வெளியிடும் என்று கூறப்பட்டது.