மாணவர் முரசு
இ-பேப்பர்
மின்சாரத்தைச் சேமிக்க உதவும் சாதனத்தை விளம்பரம் செய்யும் இணையத்தளம் ஒன்றில், சிங்கப்பூரின் மின்சாரப் பயனீடு குறித்துக் குறிப்பிடப்படும் தகவல்களைப் பொய் என்று எரிசக்தி சந்தை ஆணையம் சுட்டியுள்ளது. 'வொல்டெக்ஸ்' என்ற அச்சாதனத்திற்கான விளம்பரங்களில், சாதனத்தின் உதவியுடன் பயனீட்டாளர்கள் தங்களின் மின்சாரக் கட்டணத்தில் 90 விழுக்காட்டைக் குறைக்க முடியும் என்று கூறப்பட்டிருந்தது.
இணையத்தில் இந்த விளம்பரங்கள் அண்மையில் வலம் வந்த வண்ணம் உள்ளன. $74 விலையில் சாதனம் விற்கப்படுகிறது.
'மின்சாரத்திற்குச் செலுத்தும் கட்டணம் போக அதற்கு மேல் பெரும்பாலான சிங்கப்பூரர்கள் ஆண்டுக்கு $27.6 பில்லியன் செலுத்துகின்றனர்' என்று பெயர் குறிப்பிடப்படாத ஆய்வு ஒன்றை மேற்கோள் காட்டும் விளம்பரதாரரின் செய்தி இணையத்தளத்தில் இடம்பெற்றுள்ளது.
இந்த அதிகப்படியான கட்டணம் குறித்து 'பொதுப் பயனீட்டு ஆணையம்' ஒன்றும் செய்யவில்லை என்று கூறும் விதமாகவும் அச்செய்தி அமைந்துள்ளது. ஆனால் சிங்கப்பூரில் 'பொதுப் பயனீட்டு ஆணையம்' என்ற ஒன்று இல்லை.
இதையடுத்து கூறப்படும் இக்கூற்றுகள் யாவும் பொய் என்று ஆணையம் உறுதிப்படுத்தியுள்ளது.
சிங்கப்பூரின் மின்சாரக் கட்டணங்களுடன் 'வொல்டெக்ஸ்' இணையத்தளத்தின் இடம்பெறும் கட்டணப் பட்டியல் பொருந்தவில்லை என்றது ஆணையம்.
இதற்கிடையே மக்கள் தங்களின் மின்சாரக் கட்டணங்களைக் குறைப்பதற்கு வேறு வழிகளை நாடுமாறு ஆணையம் அறிவுறுத்தி உள்ளது.