சுமார் $700,000 மதிப்புள்ள மின்சிகரெட்டுகளையும் அவை தொடர்பான சாதனங்களையும் சிங்கப்பூருக்குள் கடத்தி வந்த குற்றத்திற்காக 14 ஆடவர்களுக்கு சிறைத் தண்டனை விதிக்கப்பட்டுள்ளது. சுகாதார அறிவியல் ஆணையமும் குடிநுழைவு சோதனைச் சாவடி ஆணையமும் இணைந்து நேற்று இதனை தங்களது கூட்டறிக்கையில் தெரிவித்தன.
கைது செய்யப்பட்டவர்கள் 22 வயதுக்கும் 54 வயதுக்கும் இடைப்பட்டவர்கள். பிடிபட்ட ஆடவர்கள் அனைவரும் மலேசிய நிறுவனத்தைச் சேர்ந்த லாரி ஓட்டுநர்கள் மற்றும் உதவியாளர்கள்.
மலேசியாவிலிருந்து சிங்கப்பூருக்குள் கோழிகளை ஏற்றி வருவதற்குப் பயன்படுத்தப்பட்ட லாரிகளை ஜூன் 7ஆம் தேதி குடிநுழைவுச் சோதனைச் சாவடி ஆணைய அதிகாரிகள் இடைமறித்து சோதனை நடத்தினர். அப்போது மலேசியாவில் பதிவு செய்யப்பட்ட ஏழு லாரிகள் பிடிபட்டன.
தடை செய்யப்பட்ட பொருட்கள் அந்த லாரிகளில் மறைத்து கடத்தி வரப்பட்டதை அதிகாரிகள் கண்டுபிடித்தனர்.
லாரி ஓட்டுநர்களும் லாரிகளில் இருந்த உதவியாளர்களும் சிங்கப்பூரில் ஒரு குறிப்பிட்ட இடத்திற்கு அந்தப் பொருள்களைக் கொண்டு செல்லுமாறு உத்தரவிட்டப்பட்டது சுகாதார அறிவியல் ஆணையம் நடத்திய விசாரணையில் தெரிய வந்தது.
அங்கிருக்கும் நபர் ஒருவர் தடை செய்யப்பட்ட இந்தப் பொருள்களைப் பெற்றுக்கொள்ள திட்டம் வகுக்கப்பட்டு இருந்தது.
54,392 மின்சிகரெட்டுகளும் அவை தொடர்பான சாதனங்களும் லாரிகளில் கடத்தி வரப்பட்டது தொடர்பாக 14 பேர் கைது செய்யப்பட்டனர். அவர்கள் அனைவரும் மலேசியர்கள்.
கடந்த வாரம் திங்கட்கிழமை (ஜூன் 28) அவர்களுக்கு வெவ்வேறு காலகட்ட சிறைத் தண்டனை விதிக்கப்பட்டது. அதிகபட்சமாக இரு மாத சிறைத் தண்டனை விதிகப்பட்டது.
கைப்பற்றப்பட்ட பொருள்களின் மதிப்பு சுமார் $700,000. சிங்கப்பூரில் இந்த அளவுக்கு மின்சிகரெட்டுகள் கைப்பற்றப்பட்டு இருப்பது இதுவே முதல்முறை.
மின்சிகரெட்டுகளையும் அவை தொடர்பான சாதனங்களையும் இறக்குமதி செய்வது, விநியோகம் செய்வது, விற்பது, விற்பனைக்காக வைத்திருப்பது போன்றவை குற்றங்களாகும்.
முதல்முறை இக்குற்றங்களில் ஈடுபட்டு நீதிமன்றத்தில் குற்றவாளி என உறுதி செய்யப்படுவோருக்கு $10,000 வரையிலான அபராதம், ஆறு மாதம் வரையிலான சிறை போன்றவை தண்டனைகளாக விதிக்கப்படலாம். மறுமுறை இதே குற்றங்களில் ஈடுபடுவோருக்கான தண்டனை இரட்டிப்பாகும்.
அதேபோல தடை செய்யப்பட்ட புகையிலைப் பொருள்களை வாங்குவதும் பயன்படுத்துவதும் குற்றங்களாகும். அந்தக் குற்றங்களுக்கு $2,000 வரை அபராதம் விதிக்கப்படலாம்.