மாணவர் முரசு
இ-பேப்பர்
சிங்கப்பூரிலும் வெளிநாடுகளிலும் கொவிட்-19 தொற்றைக் கட்டுப்படுத்த பேருதவி
கொவிட்-19 பரவல் சூழலில் சிங்கப்பூரிலும் வெளிநாடுகளிலும் சமூகத்தினரைப் பாதுகாப்பாக வைத்திருப்பதில் தெமாசெக்கும் அது முதலீடு செய்துள்ள நிறுவனங்களும் துடிப்புடன் பங்காற்றி வருகின்றன.
சுகாதாரப் பராமரிப்பு, தளவாடம், மருந்தியல் ஆராய்ச்சி போன்ற துறைகளில் கடந்த ஓராண்டுக்கும் மேலாகத் தனது நிறுவனங்கள் எடுத்து வரும் முயற்சிகளை நேற்று இடம்பெற்ற வருடாந்திர மறுஆய்வில் அரசாங்க முதலீட்டு அமைப்பான தெமாசெக் பட்டியலிட்டது.
சிங்கப்பூரில் முகக்கவசம், கைச்சுத்திகரிப்பான் விநியோக நடவடிக்கைகளை மேற்கொண்டதோடு, உள்ளூரிலும் வெளிநாடுகளிலும் கிருமித்தொற்றுப் பரிசோதனைத் தொகுப்புகளையும் தனிநபர் பாதுகாப்பு அங்கிகளையும் அது நன்கொடையாக வழங்கியுள்ளது.
இதுநாள்வரை, ஒரு மில்லியனுக்கும் மேற்பட்ட முறை கொரோனா பரிசோதனை செய்யும் வகையில், ஆசியாவிலும் அதற்கப்பாலும் 40 நாடுகளுக்கு 6,300 பரிசோதனைத் தொகுப்புகளை தெமாசெக் நன்கொடை அளித்துள்ளது.
தெமாசெக் முதலீடு செய்துள்ள நிறுவனங்களில் ஒன்றான பயோஎன்டெக் தடுப்பூசி தயாரிப்பு நிறுவனம், உலகளவில் கொவிட்-19 தொற்றுக்கெதிரான போரில் துடிப்புடன் செயல்பட்டு வருகிறது. ஃபைசர் நிறுவனத்துடன் இணைந்து அந்நிறுவனம் உருவாக்கிய தடுப்பூசி சிங்கப்பூர் உட்பட உலகின் பல நாடுகளிலும் பயன்படுத்தப்பட்டு வருகிறது.
தெமாசெக் முதலீடு செய்துள்ள பிஎஸ்ஏ இன்டர்நேஷனல், சிங்எக்ஸ் போன்ற நிறுவனங்களும் முக்கியப் பங்காற்றின. கொரோனா நோயாளிகளைத் தங்கவைப்பதற்காக சிங்கப்பூர் எக்ஸ்போவில் சமூகப் பராமரிப்பிடம் அமைத்ததில் அவை பெரும்பங்காற்றின.
இன்னொரு நிறுவனமான டி'கிரிப்ட், தானாகவே தொடர்புகளின் தடமறியும் கருவியை உருவாக்கியது. குடியிருப்பாளர்கள், வெளிநாட்டு ஊழியர் தங்குவிடுதிகளின் பணியாளர்கள் போன்றோர் பயன்படுத்தும் வகையில் 835,000க்கும் மேற்பட்ட அக்கருவிகள் விநியோகிக்கப்பட்டன.
"நம் மக்கள் வெளிப்படுத்திய பொது உணர்வால் நான் பெரிதும் ஊக்குவிக்கப்பட்டேன். இந்த இக்கட்டான சூழலில் நம் சமூகங்களைப் பாதுகாப்பாக வைத்திருப்பதில் உதவ அவர்கள் தாமாக முன்வந்து தொண்டூழியம் புரிந்தனர்," என்று தெமாசெக் தலைவர் லிம் பூன் ஹெங் குறிப்பிட்டார்.
தெமாசெக் அறநிறுவனம், சிங்கப்பூர் ஏர்லைன்ஸ், உலக உணவுத் திட்டம் ஆகிய அமைப்புகள் செய்துகொண்ட பங்காளித்துவத்தின்மூலம் சென்ற ஆண்டில் 40 மனிதாபிமான விமானங்களை இயக்க ஆதரவு வழங்கப்பட்டது.
அவை மருந்துப்பொருள்கள், தனிநபர் பாதுகாப்பு அங்கிகள், இதர இன்றியமையாத் தேவைகள் போன்றவற்றை இந்தியா, நேப்பாளம், பங்ளாதேஷ், இந்தோனீசியா போன்ற வெளிநாடுகளுக்கு எடுத்துச் சென்றன.
இதனிடையே, சென்ற ஆண்டில் தெமாசெக் ஹோல்டிங்ஸ் பங்குதாரர்களுக்கான ஆண்டு ஈவு 24.53% என மீண்டெழுந்தது. அத்துடன், புதிய சாதனை அளவாக தெமாசெக்கின் நிகர சந்தை மதிப்பு $381 பில்லியனாக உயர்ந்தது.