மாணவர் முரசு
இ-பேப்பர்
பள்ளிக்கூட சம்பவம் கற்பனைக்கு எட்டாத துயரம்: அதிபர் ஹலிமா
ரிவர் வேலி உயர்நிலைப் பள்ளியில் நிகழ்ந்த சம்பவம் நினைத்துப் பார்க்கவே கடினமானது என்றும் கற்பனைக்கு எட்டாத துயரம் என்றும் அதிபர் ஹலிமா யாக்கோப் தெரிவித்துள்ளார். உயிரிழந்த சிறுவனின் குடும்பத்தாருக்கு இரங்கல் தெரிவிக்கும் வாசகங்களை அவர் நேற்று தமது ஃபேஸ்புக்கில் பதிவிட்டார்.
"இவ்வாரத் தொடக்கத்தில் ரிவர் வேலி பள்ளிக்கூடத்தில் நிகழ்ந்ததை அறிந்ததும் ஆழ்ந்த துயருற்றேன். இளையர்கள், மாணவர்கள் உள்ளிட்ட பலரும்கூட அதிர்ச்சி அடைந்திருப்பார்கள். இச்செய்தி சிலருக்கு அச்சத்தையும் ஏற்படுத்தி இருக்கக்கூடும்.
"அதேநேரம் சிலர் ஆதரவற்றதைப்போல உணர்ந்தும் குழப்பம் அடைந்தும் இருக்கக்கூடும். அத்தகையோரில் ஒருவராக நீங்கள் இருந்தால், நீங்கள் தனிப்பட்ட ஒருவர் இல்லை என்பதை உங்களுக்கு நான் சொல்லிக்கொள்ள விரும்புகிறேன். உதவி நாடுவது என்பது பலவீனத்தின் அடையாளம் இல்லை. ஆதரவு வழங்கக்கூடிய பல குழுக்களும் அமைப்புகளும் இங்கு உள்ளன.
"எனவே உங்களின் சிரமங்களை எதிர்த்து நீங்கள் தனியாகப் போராட வேண்டியதில்லை என்பதை நினைவில் கொள்வது முக்கியம்," என்று அதிபர் தமது ஃபேஸ்புக் பதிவில் குறிப்பிட்டுள்ளார்.
கிருமிப் பரவலால் இஸ்தானா பொதுமக்கள் திறப்பு தள்ளிவைப்பு
அதிகரித்து வரும் கிருமித்தொற்று நிலவரத்தைக் கருத்தில் கொண்டு பொதுமக்களுக்கு இஸ்தானா திறந்துவிடப்படுவது தள்ளிவைக்கப்பட்டு உள்ளது. தேசிய தினத்தைக் கொண்டாடும் நோக்கில் ஆகஸ்ட் 1ஆம் தேதி பொதுமக்கள் வருகைக்காக இஸ்தானா திறந்துவிடப்படும் என்று அறிவிக்கப்பட்டு இருந்தது. ஏற்கெனவே மே 13ஆம் தேதி இஸ்தானாவுக்குச் செல்ல அனுமதி பெற்றிருந்தவர்கள் ஆகஸ்ட் 1ஆம் தேதி வருகைதர அழைக்கப்பட்டு இருந்தனர்.
மே தினம் மற்றும் நோன்புப் பெருநாள் வேளைகளில் மே மாதம் இஸ்தானாவை திறந்துவிடத் திட்டமிடப்பட்டு அதற்கான நுழைவுச்சீட்டுகள் வழங்கப்பட்டு இருந்தன.
கிருமிப் பரவல் தலைதூக்கியதைத் தொடர்ந்து அப்போதும் இஸ்தானா பொதுமக்கள் வருகை தள்ளிப் போடப்பட்டது. இந்நிலையில், ஆகஸ்ட் 1ஆம் ேததியும் இஸ்தானா திறக்கப்பட மாட்டாது என்ற அறிவிப்பால் பொதுமக்களுக்கு ஏற்பட்டிருக்கும் சிரமத்திற்கு மன்னிப்பு கேட்டுக்கொள்வதாக அதிபர் அலுவலகம் நேற்று ஓர் அறிக்கையில் தெரிவித்தது.
கொள்ளைநோய் பரவல் தொடங்கிய சமயத்தில் கடந்த ஆண்டு பிப்ரவரி முதல் இஸ்தானா பொதுமக்களுக்குத் திறந்து விடப்படவில்லை. ஆகக் கடைசியாக கடந்த ஆண்டு சீனப் புத்தாண்டு இரண்டாம் நாளான ஜனவரி 26ஆம் தேதி இஸ்தானா திறந்துவிடப்பட்டபோது 12,000க்கும் மேற்பட்ட சிங்கப்பூர் குடியிருப்பாளர்கள் அங்கு சென்று உபசரிப்பை அனு
பவித்தனர்.
12 தொடக்கப் பள்ளிகளில் குலுக்கல் முறை பதிவு
இவ்வாண்டின் மூன்றாம் கட்ட தொடக்கநிலை 1 மாணவர் பதிவுக்கான குலுக்கல் 12 தொடக்கப் பள்ளிகளில் இடம்பெற உள்ளது. கோங்ஷாங் தொடக்கப் பள்ளி, ஹோலி
இன்னசன்ட்ஸ் தொடக்கப் பள்ளி, நான் ஹுவா தொடக்கப் பள்ளி, ரூலாங் தொடக்கப் பள்ளி போன்றவை அந்தப்
பட்டியலில் உள்ளதாக கல்வி அமைச்சு அதன் இணையப் பக்கத்தில் தெரிவித்துள்ளது. ஆக அதிக விண்ணப்பங்களை நான் ஹுவா தொடக்கப் பள்ளி பெற்றுள்ளது. அங்கு காலியாக உள்ள ஐந்து இடங்களுக்கு 21 பிள்ளைகள் விண்ணப்பம் செய்துள்ளனர். குலுக்கல் முடிவுகள் நாளை
வெள்ளிக்கிழமை குறுந்தகவல் மூலம் பெற்றோர்களுக்கு அனுப்பி வைக்கப்படும். கடந்த ஆண்டு மூன்றாம் கட்டப் பதிவின்போது அதிக விண்ணப்பம் காரணமாக 14 பள்ளிக்கூடங்களில் குலுக்கல் முறை பதிவு நடத்தப்பட்டது.