மாணவர் முரசு
இ-பேப்பர்
கொவிட்-19 கிருமித்தொற்றுக் கட்டுப்பாடுகள் சூழ்நிலையிலும் சிங்கப்பூரின் உற்பத்தித் துறை தொடர்ந்து எட்டாவது மாதமாக வளர்ச்சி கண்டுள்ளது.
தொழில்துறை உற்பத்தி கடந்த ஆண்டுடன் ஒப்பிடுகையில் 27.5% விரிவடைந்தது. அது புளும்பர்க் நிறுவனம் முன்னுரைத்த 27.2% வளர்ச்சியைவிட சற்று உயர்வானது.
நிலையற்ற உயிர்மருத்துவ உற்பத்தித் துறையைத் தவிர்த்து, பொதுவான உற்பத்தித் துறை 24.8% ஏற்றம் கண்டதாக பொருளியல் வளர்ச்சிக் கழகம் நேற்று வெளியிட்ட தரவுகள் காட்டின.
மாதத்துக்கு மாதம் என்ற அடிப்படையில், ஒட்டுமொத்த உற்பத்தித் துறை 3% சரிந்தது. உயிர்மருத்துவ உற்பத்தியைத் தவிர்த்த பொதுவான உற்பத்தித் துறை 0.7% வளர்ச்சி கண்டது.
ஆண்டு அடிப்படையில், உயிர் மருத்துவ உற்பத்தி கடந்த மாதம் 42.5% வளர்ச்சியடைந்தது. மருந்தியல் துறையில் ஏற்பட்ட அதிக உற்பத்தியே அதற்குக் காரணம்.
மருத்துவத் தொழில்நுட்பம், கடந்த ஆண்டுடன் ஒப்புநோக்க இவ்வாண்டின் முதல் ஆறு மாதங்களில் 3.75% வளர்ச்சி கண்டது. உயிர்மருத்துவ உற்பத்தி இவ்வாண்டின் முதல் ஆறு மாதங்களுக்கு 5% ஏற்றம் கண்டது.
சிங்கப்பூரின் முக்கியமான மின்னணுவியல் உற்பத்தி கடந்த ஆண்டுடன் ஒப்புநோக்க 26.2% வளர்ச்சி அடைந்தது.
தகவல் தொடர்பு, பயனீட்டாளர் மின்னணுவியல் துறைகளைத் தவிர மற்ற எல்லா துறைகளும் விரிவடைந்தன. இந்தக் குழுமம் இவ்வாண்டின் முதல் அரையாண்டில் 23.6% வளர்ச்சி கண்டது.
துல்லிய பொறியியல் உற்பத்தி, ஆண்டு அடிப்படையில் 22.2% வளர்ச்சி கண்டது. அதில் இயந்திரம் மற்றும் அமைப்புமுறைவின் வளர்ச்சி 28.6%. பகுதி மின்கடத்தி மற்றும் தொழில்துறை செயல் முறைச் சாதனம் ஆகியவற்றில் தென்பட்ட வளர்ச்சியே துல்லிய பொறியியல் உற்பத்தியின் வளர்ச்சிக்கு முக்கிய காரணங்களாக இருந்தன.
பெட்ரோலியத் துறையின் வளர்ச்சி காரணமாக ரசாயனத் துறையும் 30.6% வளர்ச்சி கண்டது.
போக்குவரத்துப் பொறியியல் 28.3% வளர்ந்தது. பொதுவான உற்பத்தி ஆண்டு அடிப்படையில் 17.4% உயர்ந்தது என்று பொருளியல் வளர்ச்சிக் கழகம் கூறியது.