தேசிய தேர்வுகளுக்கான பாடங்கள் குறைப்பு

இவ்வாண்டு 'ஓ', 'என்', 'ஏ' நிலைத் தேர்வுகளை எழுதும் மாணவர்களுக்குப் பாடத்திட்டத்தின் இறுதியில் இடம்பெற்றுள்ள சில பாடங்களில் (சிஎல்டி) இருந்து கேள்விகள் கேட்கப்படாது என்று கல்வி அமைச்சர் சான் சுன் சிங் தெரிவித்து இருக்கிறார்.

சற்று அழுத்தத்தைக் குறைக்கும் வகையில், மற்ற வகுப்பு மாணவர்களுக்கும் ஆண்டிறுதித் தேர்வுகளுக்கான பாடங்கள் குறைக்கப்படலாம்.

உருமாறிய 'டெல்டா' கொரோனா கிருமி எதிர்பார்த்ததற்கும் மேலாக பள்ளி நடவடிக்கைகளுக்கு இடையூறு ஏற்படுத்திவிட்டமையால், தேர்வெழுதும் மாணவர்கள்மீது தமது அமைச்சு குறிப்பாக அக்கறை செலுத்தி வருவதாக திரு சான் கூறினார்.

விரைவாகவும் அதிகமானோரையும் தொற்றவல்ல 'டெல்டா' கிருமியால் அண்மைய மாதங்களாக கொரோனா பரவல் கூடியுள்ளது.

"'சிஎல்டி' எனும் அந்தப் பாடங்கள் ஏற்கெனவே பள்ளிகளில் பயிற்றுவிக்கப்பட்டு இருந்தாலும், தேசிய அளவிலான தேர்வுகளில் இருந்து அவற்றை நீக்குவது, மாணவர்கள் தேர்வு அழுத்தத்தில் இருந்து விடுபட உதவும்," என்று அமைச்சர் சான் குறிப்பிட்டார்.