மாணவர் முரசு
இ-பேப்பர்
சிங்கப்பூரில் சில்லறை வர்த்தகம் சென்ற ஆண்டுடன் ஒப்பிடுகையில் இந்த ஆண்டு ஜூனில் 25.8% கூடியது.
கொவிட்-19 காரணமாக கடுமையான கட்டுப்பாடுகள் சென்ற ஆண்டில் நடப்பில் இருந்தன. இதனால் சென்ற ஜூனில் வர்த்தகம் குறைவாகவே இருந்தது.
சென்ற ஆண்டு மே மாதம் முழுவதும் பொருளியல் முடக்கம் நடப்பில் இருந்தது. ஆகையால் இந்த ஆண்டு மே மாதம் சில்லறை வர்த்தகம் 79.9% அதிகமாகி இருந்தது. அது, இந்த ஆண்டு மே மாதத்தைவிட ஜூன் மாதம் குறைவாகவே கூடியது.
சில்லறை வர்த்தகம் கொரோ னாவுக்கு முந்தைய நிலையைவிட தொடர்ந்து குறைவாகவே இருந்து வருகிறது என்பதை சிங்கப்பூர் புள்ளிவிவரத் துறை சுட்டிக்காட்டியது. மோட்டார் வாகனங்களை நீக்கிவிட்டுப் பார்க்கையில் சில்லறை வர்த்தகம் ஜூன் மாதம் 19% கூடியது.
இந்த அதிகரிப்பு மே மாதம் 61.7% ஆக இருந்தது. இந்த ஆண்டு ஜூன் மாதம் மொத்த சில்லறை வர்த்தகத்தின் மதிப்பு ஏறத்தாழ $3.3 பில்லியன் என்று தெரிவிக்கப்பட்டு உள்ளது.
இதில் இணையம் வழியாக நடந்த விற்பனைகளின் மதிப்பு 15.4 விழுக்காடாக இருக்கும் என்று கணக்கிடப்பட்டு இருக்கிறது. இணையம் வழி இடம்பெற்ற வர்த்தக ஊக்குவிப்பு செயல்திட்டங்களே இதற்கு முக்கிய காரணமாக இருந்தது. இந்த அளவு மே மாதத்தில் 13.8 விழுக்காடாக இருந்தது.
மோட்டார் வாகனங்களை சேர்க்காமல் பார்க்கும்போது மொத்த சில்லறை வர்த்தகத்தின் மதிப்பு ஏறத்தாழ $2.7 பில்லியன். இதில் கணினி வழி நடந்த வர்த்தகத்தின் மதிப்பு 18.4% என்று தெரிவிக்கப்பட்டது.
கணினி, தொலைத்தொடர்புச் சாதனங்கள், அறைகலன்கள், வீட்டு சாமான்கள் போன்றவை ஜூன் மாதம் இணையம் வழி அதிகமாக விற்பனையாயின.