மாணவர் முரசு
இ-பேப்பர்
இந்து இளங்கோவன்
பார்க்கும் ஒவ்வொரு திரைப்படமும் 33 வயது செ. விக்னேஸ்வரனுக்கு ஒரு பாடம். எந்தத் திரைப் படத்தைப் பார்த்தாலும் அதன் திரைக்கதை, ஒளிப்பதிவு போன்றவற்றை பகுத்தாய்ந்து தமது எண்ணங்களைக் குறிப்பு எடுத்துக்கொள்வார் குறும்பட இயக்குநரான விக்னேஸ்.
கடந்த ஐந்து ஆண்டுகளில் முழுமூச்சாகவும் முறையான பயிற்சி பெற்றும் குறும்பட/திரைப்படங்களைத் தயாரிக்கும் இளையர்களின் எண்ணிக்கை அதிகரித்துக்கொண்டே வருகிறது. அவர்களில் வின்கேசும் ஒருவர்.
கடந்த மாதம் நடைபெற்ற 7வது தேசிய இளையர் திரைப்பட விருது விழாவில் 'டார்க் லைட்' என்னும் இவரது படத்திற்காக இவருக்கு சிறந்த இயக்குநர் விருது வழங்கப்பட்டது.
குறும்படத்தின் இயக்குநரும் நிர்வாகத் தயாரிப்பாளருமான விக்னேஸ், படத்தயாரிப்புக்குச் செலவான $15,000 தொகையை ஏறத்தாழ ஓராண்டு காலம் 'கிராப்' வாடகைக் கார் ஓட்டி, சிறிது சிறிதாகச் சேமித்தார்.
தமது முதுநிலை பட்டப் படிப்பிற்கான நிதியையும் விக்னேஸ் 'கிராப்' வாடகை கார் ஓட்டிதான் சம்பாதித்தார்.
ஊடகத் துறையில் தடம் பதிக்கவேண்டும் என்ற குறிக்கோளுடன்சிங்கப்பூரின் திரைப்படத்துறையில் இளநிலைப் பட்டம் பெற்றார் விக்னேஸ்.
படிப்பை முடித்த பின்னர் அவர் எடுத்த 'புளு பப்பெட்டியர்' என்னும் குறும்படம், மேன்ஹாட்டன் திரைப்பட விழாவிற்கு தகுதி பெற்றது. நியூயார்க்கில் நடந்த விழாவின் படத் திரையிடலுக்கு சென்றிருந்த விக்னேஸ், பிறநாட்டுப் படங்களின் தரத்தைக் கண்டு வியந்துபோனார்.
படத் தயாரிப்பைப் பற்றிக் கற்றுக்கொள்ள இன்னும் அதிகம் உள்ளது என்பதை உணர்ந்த அவர், தமது அறிவை விரிவாக்கிக் கொள்ள ஊடகத் துறையில் சிறு சிறு வேலைகளைச் செய்தார்.
பிறகு, லண்டனுக்குச் சென்று பட இயக்கத்தில் முதுநிலைப் பட்டக் கல்வியை மேற்கொண்டார். அதன்பின்னர் 'புளு பப்பப்டியர்' குறும்படத்தை 'பப்பப்டியர்' என்னும் பெயரில் மறு ஆக்கம் செய்தார். இப்படம் பல திரைப்பட விழாக்களில் 39க்கும் மேற்பட்ட நியமனங்களைப் பெற்று, ஆறு விருதுகளை வென்றது.
பார்க்கும் அனுபவங்களையும் தூக்கத்தில் காணும் கனவுகளையும் மையமாகக்கொண்டு, படங்களுக்கான கதையைச் செதுக்கும் விக்னேசிற்கு பிரபல ஹாலிவுட் திரைப்பட இயக்குனர் கிறிஸ்டஃபர் நோலனின் படங்கள் என்றால் கொள்ளைப் பிரியம். தாமும் சிந்தனைகளைத் தூண்டும் சுவாரசியமான படங்களை எடுத்து சிங்கப்பூரின் கிறிஸ்டஃபர் நோலனாக வேண்டும் என்பது இவரி ஆசை.
கலைஞர்கள் வளர உதவி தேவை
சொந்த முயற்சியில் ஒரு படம் எடுப்பது, அதுவும் சிங்கப்பூரில் எடுத்து வெளியிடுவது சுலபமல்ல,
"'டார்க் லைட்' குறும்படத்தில் 'long take' என்று அழைக்கப்படும் நீள்காட்சி ஒளிப்பதிவு உத்தியை பயன்படுத்தியுள்ளோம். இந்தக் காட்சியை எடுக்க பலமுறை ஒத்திகை செய்ய வேண்டியிருந்தது. ஒவ்வொரு வார இறுதியிலும் படக்குழுவுடன் காட்சி எடுக்கப்பட்ட இடத்திற்கு சென்று ஒத்திகை பார்த்தோம். படப்பிடிப்பு நாளன்று 10 முறை முயற்சி செய்தபின் 11ஆம் முறை பதிவான காட்சி திருப்திகாரமாக அமைந்தது. ஒரே இலக்குள்ளவர்களுடன் இணைந்து பணியாற்றும்போது சிரமம் அவ்வளவாக தெரிவதில்லை," என்றார், அடுத்த படத்திற்கான ஆயத்த வேலைகளில் மும்முரமாக இருக்கும் இந்த இளையர்.
"தற்போதுவரையில் சொந்த செலவில்தான் படங்களைத் தயாரித்து வருகிறேன். இது நீண்ட காலத்துக்குத் தாக்குப்பிடிக்கக்கூடதல்ல. என்னைப் போன்ற படைப்பாளிகள் நிதி பெற கூடுதல் வழிகள் உருவாக்கப்பட வேண்டும்," என்று பரிந்துரைத்தார் விக்னேஸ்.
