மாணவர் முரசு
இ-பேப்பர்
சிங்கப்பூரின் மூத்த குடிமக்களில் பெரும்பாலோர் ஒரு முறையாவது கொவிட்-19 தடுப்பூசியைப் போட்டுக்கொண்டுள்ளதாக சுகாதார அமைச்சர் ஓங் யி காங் கூறியுள்ளார்.
70 வயதைத் தாண்டிய மூத்த குடிமக்களில் 85 விழுக்காட்டினர் ஒரு முறையாவது தடுப்பூசியைப் போட்டுக்கொண்டுள்ளதாக அவர் சொன்னார். 60லிருந்து 69 வயதுக்கு உட்பட்டோரிடையே 90 விழுக்காட்டுக்கும் அதிகமானோர் தடுப்பூசி போட்டுக்கொண்டுள்ளனர் என்று அவர் சொன்னார்.
மேலும், சிங்கப்பூரில் தற்போது ஒரு நாளைக்கு ஏறக்குறைய 40,000 தடுப்பூசிகள் போடப்பட்டுவருகின்றன. இந்த எண்ணிக்கை, இதற்கு முன் இருந்ததில் கிட்டத்தட்ட பாதி அளவாகும். பெரும்பாலோர் தடுப்பூசி போட்டுக்கொண்டுள்ளது அளவு குறைந்ததற்குக் காரணம் என்று அமைச்சர் குறிப்பிட்டார்.
மக்கள்தொகையில் ஆக அதிகமானோருக்கு கொவிட்-19 தடுப்பூசி போட்ட நாடாக சிங்கப்பூர் இருக்கக்கூடும் என்று சிஸ்92 எஃப்எம் வானொலிக்கு அளித்த பேட்டியில் திரு ஓங் கூறினார்.
கடந்த சனிக்கிழமை நிலவரப்படி சிங்கப்பூரின் மக்கள்தொகையில் சுமார் 75 விழுக்காட்டினர் இரண்டு முறை கொவிட்-19 தடுப்பூசியைப் போட்டுக்கொண்டுள்ளதாகத் தெரிவிக்கப்பட்டது.
தடுப்பூசியைப் போட்டுக்கொண்ட பிறகும் போதுமான எதிர்ப்பு சக்தி இல்லாதோருக்கு விரைவில் கூடுதல் தடுப்பூசி தேவைப்படலாம் என்றார் அவர். அத்தகையோருக்கு இரண்டு முறை தடுப்பூசி போட்டுக்கொண்ட பின் சுமார் ஓராண்டு காலத்திற்குப் பிறகு கூடுதல் தடுப்பூசி தேவைப்படலாம். மருத்துவ ரீதியான காரணங்களால் ஃபைசர், மொடர்னா ஆகிய நிறுவனங்களின் தடுப்பூசிகளைப் போட்டுக்கொள்ள முடியாதோரை சீனாவின் சினொவேக் தடுப்பூசிபைப் போட்டுக்கொள்வது குறித்து ஆலோசிக்குமாறு திரு ஓங் அறிவுறுத்தினார்.
கொவிட்-19 கிருமி தொற்றாமல் தடுப்பதற்கான ஆற்றல் 'எம்ஆர்என்ஏ' ரக தடுப்பூசிகளில் இருக்கும் அளவு சினொவேக் தடுப்பூசிகளில் இல்லாமல் இருக்கலாம். ஆனால் மோசமாக நோய்வாய்ப்படுவதைத் தவிர்க்கும் ஆற்றல் சினொவேக் தடுப்பூசிகளில் அதிகம் உள்ளது என்பதை அவர் சுட்டினார். எனினும், டெல்டா வகை கொவிட்-19 கிருமித்தொற்றை சினொவேக் எவ்வளவு தூரம் தடுக்கும் என்பது இன்னமும் தெரியவில்லை எனத் திரு ஓங் சொன்னார். தடுப்பூசிபோட்டுக்கொள்ள முடியாதோர், பிறர் அவற்றைப் போட்டுக்கொள்ளும் வரை காத்திருக்கவேண்டும் என்றார் அவர்.
"நாம் தடுப்பூசி போட்டுக்கொள்ளும்போது நம்மை மட்டும் பாதுகாக்கவில்லை-அதைப் போட்டுக்கொள்ள முடியாதோரையும் பாதுகாக்கிறோம்," என்று அவர் குறிப்பிட்டார்.