மாணவர் முரசு
இ-பேப்பர்
நியூட்டன் சர்க்கஸ் அருகேயுள்ள டன்னர்ன் ரோட்டில் நேற்று புதிய 'யூ-டர்ன்' செய்யும் வசதி தொடங்கியது. உட்லண்ட்ஸ், புக்கிட் தீமாவை நோக்கி பயணிக்க விரும்பும் ஓட்டுநர்கள் இனி, போக்குவரத்து நெரிசல் அதிகமாக ஏற்படும் 'ரவுண்டபவுட்'டிற்காகக் காத்திருக்கத் தேவையில்லை.
நியூட்டன் சர்க்கஸில் 2017ல் தொடங்கிய மேம்பாட்டுப் பணிகள் இத்துடன் முடிவு பெற்றன.
உட்லண்ட்ஸ், புக்கிட் தீமாவிலிருந்து வரும் வாகனங்களுக்கான யூட்டர்ன் வசதி, ஜூலை மாதம் தொடங்கியது.
2016லிருந்து 2018 வரை ஆண்டுதோறும் நியூட்டன் சர்கஸ் பகுதியில் சுமார் ஒன்பது விபத்துகள் பதிவாயின. இந்த புதிய யூட்டர்ன் வசதிகள் மூலம் 'ரவுண்டபவுட்'டைப் பயன்படுத்தும் வாகனங்களின் எண்ணிக்கை குறையும் என்று அதிகாரிகள் நம்பிக்கை தெரிவித்துள்ளனர்.
நோய்த்தொற்றால் தாமதமடைந்துள்ள இம்மேம்பாட்டுத் திட்டத்தின் முடிவால் ஆயிரக்கணக்கானோர் பயன் அடையக் கூடும்.
இப்பகுதியைப் பிரதிநிதிக்கும் நாடாளுமன்ற உறுப்பினரான கலாசார, சமூக, இளையர்துறை துணை அமைச்சர் திரு ஆல்வின் டான், குழப்பம் தரக்கூடிய நியூட்டன் சர்க்கஸில் வாகனத்தைச் செலுத்த ஓட்டுநர்களுக்குப் புதிய யூட்டர்ன் வசதி துணை புரியும் என்றார்.
சிங்கப்பூர் சீன பெண்கள் பள்ளி, 'ஏசிஎஸ் (பார்க்கர் ரோடு)' போன்று, நியூட்டன் சர்க்கஸ் அருகே உள்ள பள்ளிகளில் தங்கள் பிள்ளைகளை இறக்கிவிடும் பெற்றோருக்கும் உச்ச நேர போக்குவரத்தைச் சமாளிக்க இது உதவும் என்றும் அவர் நம்புவதாக தெரிவித்தார்.
ஜூலை மாதம் தொடங்கப்பட்ட யூட்டர்ன் வசதியை விட இந்த புதிய யூட்டர்ன் வசதி போக்குவரத்து நெரிசலைக் குறைக்கும் என்றும் அவர் கூறினார். "சென்ற ஆண்டு பல குடியிருப்பாளர்களை நான் சமாதானப்படுத்த வேண்டியிருந்தது." என்று கூறனார் துணையமைச்சர். கடந்த ஆண்டுகளில் நிலப் போக்குவரத்து ஆணையம் நியூட்டன் சர்க்கஸில் பல மாற்றங்களை ஏற்படுத்தியுள்ளது.
நியூட்டன் எம்ஆர்டி நிலையத்தை எளிதில் சென்றடைய ஜூலை மாதம் நியூட்டன் ரோட்டிற்கும் டன்னர்ன் ரோட்டிற்கும் இடையே பாதசாரிகள் கடந்துசெல்லும் பாதை ஒன்று தொடங்கப்பட்டது. அடுத்த சாலைத்தளத்தில் நுழைவதைத் தவிர்க்க, புக்கிட் தீமா ரோட்டில் உள்ள பேருந்து நிறுத்தம் ஒன்று மீண்டும் கட்டப்பட்டது.
ஜூன் மாதம் வாகனங்களுக்கு, குறிப்பாக பொது பேருந்துகளுக்கு கூடுதல் வழி வகுக்க நியூட்டன் சர்க்கஸை ஆணையம் அகலப்படுத்தியது. இது வாகனங்களைத் திருப்பும்போது ஏற்படும் சிரமாங்களைக் குறைத்தது.
புக்கிட் தீமா கிளமென்ஸ்சியூ அவென்யூ நார்த்தில் உள்ள 'ரவுண்டபவுட்'டில் போக்குவரத்து விளக்குகளும் அமைக்கப்பட்டுள்ளன. மேலும் 'பால்மோரல் பிளாஸா' சந்திப்பில் ஏற்படவிருக்கும் மேம்பாட்டுப் பணிகள் குறித்தும் நிலப் போக்குவரத்து ஆணையம் நேற்று தெரிவித்தது.