கூடுதலான சாலைகளுக்குப் பெண்களின் பெயர்களைச் சூட்டுமாறு சிங்கப்பூர் மகளிர் அமைப்புகள் மன்றம் கேட்டுக்கொண்டுள்ளது. தற்போது சுமார் 40 சாலைகளுக்கு மட்டுமே பெண்களின் பெயர்கள் சூட்டப்பட்டிருப்பதை மன்றம் சுட்டியது.
அதே வேளையில் கிட்டத்தட்ட 540 சாலைகளுக்கு ஆண்களின் பெயர்கள் சூட்டப்பட்டிருப்பதாக அது குறிப்பிட்டது.
பெண்களின் பெயர்களைக் கொண்ட சாலைகளில் பாதிக்கு பிரிட்டனின் அரச பரம்பரையைச் சேர்ந்த பெண்களின் பெயர்கள் உள்ளன. எலிசபெத் டிரைவ், மார்கரெட் சாலை ஆகியவை அவற்றில் அடங்கும்.
எஞ்சியவற்றுக்கு சிங்கப்பூரை ஆட்சி செய்த பிரிட்டிஷ்காரர்கள், ஆரம்ப கால சிங்கப்பூர் வர்த்தகர்கள் ஆகியோரின் பெண் உறவினர்களின் பெயர்கள் சூட்டப்பட்டுள்ளன.
இதன் தொடர்பில் பாலினப் பாகுபாட்டைக் குறைப்பதற்கான பரிந்துரையை சிங்கப்பூர் மகளிர் அமைப்புகள் மன்றம் நேற்று முன்தினம் வெளியிட்டது.
கூடுதலான பொது இடங்களுக்குப் பெண்களின் பெயர்களை சூட்டுமாறு அது வேண்டுகோள் விடுத்துள்ளது.
பெண்கள் ஆற்றிய பங்கையும் அவர்களின் முற்போக்குச் சிந்தனையையும் கௌரவிக்கும் வகையில் டோபி காட் க்ரீன் பகுதியில் தோட்டம் ஒன்றை உருவாக்கத் திட்டமிடப்பட்டுள்ளதாகப் பிரதமர் லீ சியன் லூங் அறிவித்திருந்தார். நேற்று முன்தினம் சிங்கப்பூரின் பெண்களின் வளர்ச்சி மீதான கலந்துரையாடலின் கடைசி அமர்வில் திரு லீ அதைக் குறிப்பிட்டிருந்தார்.
தற்போது மூன்று சாலைகளுக்கு மட்டுமே சிங்கப்பூர் சமூகத்திற்குப் பங்காற்றிய பெண்களைக் கௌரவிக்கும் வகையில் பெயர்கள் சூட்டப்பட்டிருப்பதாகத் தெரிவிக்கப்பட்டுள்ளது. சிக்லப்பில் உள்ள ஜாலான் ஹஜிஜா, எலியட் சாலை மற்றும் வாக், புக்கிட் தீமாவில் உள்ள பிளாக்மோர் ட்ரைவ் ஆகியவை அவை.